2021年6月3日

【輪證贏家】冷吼嗶哩淡倉

噚日上半場見到恒指開波頭嗰半個鐘喺條保歷加通道裡面浮浮沉沉，等到10點40分先至見到指數明顯失守保歷加通道中軸後，早已喺聊天室同大家講定可以入淡倉，逢見到指數不敵50分鐘線(五分鐘圖 x 10線)或100分鐘線(五分鐘圖 x 20線)就出淡倉或hold淡倉；下半場玩法都係咁。

先係喺1點10分至2點，恒指咬住保歷加通道中軸不放，基本上都可以出到淡倉，不過，按噚日喺Patreon出文2點27分計，呢個位未出文唔計佢。再等至下晝3點15分至3點30分，指數再次上破保歷加通道中軸，但都係無功無回，同步見SlowSTC(14,3)由6X至70呢個位掉頭向下，恒指熊(57311)喺呢個位當然可以入市啦，按當時高低位$0.07/$0.06計，平均買入價為$0.065。不過望望鐘，只係得返半個鐘，唔入，絕對無人怪你；入咗嘅話都要識得喺臨完場前走人，事關喺打鐘前五分鐘，恒指五分鐘圖上SlowSTC(14,3)落到20樓下，而(57311)證價做緊$0.67，得嗰兩格叫做和到個手續費，走貨，今晚可能有覺好瞓；唔走貨，就即係博單車變摩托。

噚晚同兩位前輩食飯，三條友食煙飲酒講粗口咩都齊，席間聽過佢哋以前嘅經歷、聽過佢哋分享以往行內行外嘅趣事，更重要嘅係兩位開發咗我一個新思維、新領域，呢樣嘢如果我仲坐喺以前個位，隨時一世都係接觸唔到、諗唔到。忽然諗起年初返老爸家時，無聊睇咗一本佢買返嚟嘅運程書，話我呢個生肖嘅人今年係「塞翁失馬」年，唔到最後都唔知會發生咩事，intersting！同個市一樣，一日唔打鐘，一日都仲未知係升定跌。

亦都好似今日依家個市咁，今朝恒指U盤開升67點，開市報29365點；到依家恒指轉升為跌58點，報29239點，又係一個點數唔多郁嘅市況，今朝同聊天室戰友睇過牛熊證街貨圖，牛證再多兩層新增街貨層，最貼價嘅上移至29200至29299點，而牛熊證中間價則為(29299+29500)/2=29399.5點，對比現時恒指粒數，數值上係叫做近下方牛證街貨，「明明上方熊證都有唔少街貨喺度，咩事唔向上打返而向下打？」唯一可以解釋嘅就係保歷加通道未見有拓闊，同噚日一樣，由得恒指喺個細pool度游走住先啦。

指數無嘢玩就唯有向個股出發，搵咗一陣都無咩頭緒(有嘅但係真係未明顯轉勢，所以繼續觀察住啫)，終於搵到去嗶哩嗶哩(09626)，日線圖今日嚟個裂口低開，再加上SlowSTC(14,3)完美地由高位%K線穿%D線向下回落；只係反轉頭睇五分鐘圖見股價現處於低位，同步SlowSTC(14,3)亦打算於低位回升，唯有等股價撞唔過50鐘線或者100分鐘線時，小注出嗶哩Put(23172)，行使價$61.85，引伸偏低，槓桿係全場九隻之中最高，講緊都係得約3.04倍，哈哈，冷門嘢係咁上下架啦。

廣告時間：今日開始，Patreon會新增一個Plan【每日一股】，顧明意義就係每日篤一隻個股出嚟，圖文並茂技術分析解說，再加即市策略；Join Plan嘅，隨時篤隻個股比我做當日文章主題都仲得！上半場出文，下半場有得炒！生意難做，有時間就去FB望下啦。

作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。

Patreon：https://www.patreon.com/cbbcwar
秒投輪證教室：https://bit.ly/31HG6AN