2021年5月31日

【輪證贏家】5月唔窮6不絕？

嚟到5月最後一個交易日，今日未出門口已經見到出面天黑黑，睇住新聞望住右下角日經都見紅，但開恒指牛熊證街貨圖就見到以上星期五(5月28日)恒指收市點數計，同牛熊街貨中間位(28999+29300)/2=29149.5點好近，去到呢個位純以街貨量多寡去秤的話，上方熊證的確吸引。

N年前一個烈酒廣告其中有一句對白，到依家都係正確「世事無絕對」；喺小妹眼中所有嘢都只有「比對」，股市亦然。那怕恒指今朝開市先升過百點，向住多街貨嘅熊證出發好符合「劇情發展」，但偏偏到9點半打鐘嗰一刻即時嚟個反高潮，五分鐘圖上見到指數出一支極大嘅「陰燭」向下走，聊天室唯有即市改變策略，等SlowSTC(14,3)兩線數值上得到確認之後先至再出好倉，結果，喺9點50分左右見到SlowSTC(14,3)兩線轉勢，先上望50分鐘線(五分鐘圖 x 10線)，進取再上望100分鐘線(五分鐘圖 x 20線)。

仲有一日就到6月，今個5月，截至依家10點25分恒指報29046點，暫計全個5月升322點，雖然唔說得上係好好嘅升幅，但根本一啲都唔窮！六絕會唔會出現都真係一個迷。睇返恒指日線圖，其實行緊一個好大型嘅「楔形」，「楔形」同「三角形」一樣都係待變嘅意思，只不過係前者未埋口，後者埋咗口咁解(師傅以前係咁教)。

以目前恒指情況，假設六絕唔會出現，而大市繼續喺呢個「楔形」裡面遊走的話，再配合今日見到嘅SlowSTC(14,3)喺80以上嘅超買位向下回落中，搞到人羅羅攣想出隻恒指Put，「啱方向咪出囉，想咪出囉，做乜會羅羅攣先？」早排先high完隻恒指Put，你唔記得我記得呀。

恒指Put(25730)，行使價29000點，同現價有0.3%差距，屬極度輕微價外Put，引伸偏低但高槓桿，吼恒指五分鐘圖見SlowSTC(14,3)超買時進場；諗諗下用嚟做DT都OK囉，都有成15.5倍槓桿架，依家10點36分見恒指五分鐘圖都過唔到100分鐘線，唔通今日恒指氣數就係界乎保歷加通道中軸至底部？

作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。