2021年5月27日
噚日下半場寫緊【輪證下半Part】時手多揀隻美團(03690)出嚟，諗住見到佢條SlowSTC(14,3)有啲異動，快手捉隻美團牛(64870)落場。諗就更係諗得美好啦，不過落咗場之後不消10分鐘已經見到股價喺五分鐘圖上到保歷加通道中軸，再比多5分鐘，SlowSTC(14,3)又回返落嚟，股價仍受制於保歷加通道中軸，而整條保歷加通道勢頭仍然向下，呢啲情況都知道無得勉強，又或如平時喺聊天室所講：Swing Trade都可以用保歷加通道底至中軸，或者頂至中軸，都無一定要由頂至底，或者底去返頂，問題只係在於通道有幾闊。喺咁艱難嘅環境之下，呢注美團牛唯有火速收隊，(64870)呢一趟和到手續手打個和。
今朝起身，我家老爺話比我知曼聯輸波，作為利物浦球迷嘅佢不知幾高興，高興在於我又課金買曼聯客勝，燈神再現，Well，或者我都係時侯退出體育界呢個戰場，廢事舊場老友阿珍嬲到搭車過嚟鬧我！哈哈！
依家10點20分，恒指今朝低開後見回升，喺五分鐘圖上見指數上返保歷加通道中軸後無耐又再回過，都係嘅，就算今朝恒指低開16X點，其實指數都係靠近上方熊證街貨；再者，熊證嗰邊都收埋咗唔少街貨喺度；但換上小時圖又的確見到恒指SlowSTC(14,3)高位回落。又係街貨同技術分析之爭，雖然按照過去情況，十次有九次都係街貨贏，不過目前恒指同兩邊現價都唔係近(純綷以牛熊街貨中間位同恒指現價比較，先見恒指近上方熊證)，再加上早兩日個市都已經殺唔少街貨，都係唔搞條恒指啦。
本想喺個股埋手，例如隻小米(01810)，五分鐘圖上見小米今朝高開後低走，至依家見SlowSTC(14,3)已經落到嚴重超走水平，仲出緊超賣再超賣，股價目前亦喺250分鐘線(五分鐘圖 X 50線)度作勢見支持；但10分鐘圖就暫時仲未見轉勢，怕且都要睇定啲(等轉勢)先可以出手。
小米牛(64294)，收回價$27，同現價有近6%差距，逾12倍槓桿適合DT，呢啲不穩定嘅市況都係睇定啲先好入場。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
秒投輪證教室：https://bit.ly/31HG6AN
