2021年5月26日
噚日一路開會一路睇住個市，就係喺人哋開緊會嘅時侯，恒指先嚟隊上到28900點樓上，激氣！搞到隻恒指牛(64784)食少咗唔知幾多格；是但啦，嗰啲鐘數接近收市，唔通無啦啦走去追咩！錢多都唔係咁玩法啦，更何況我無！不過真係好嬲！激氣！
依家10點正，恒指今朝早開市先升逾140點，開市後無耐都見指數咬住喺呢個水平，不過好快又再上，望望牛熊證街貨圖，見到恒指已經殺咗首兩層熊證街貨，就連第二層重貨區29000至29099點嗰1507張期指都食埋，期結周果然係有料到，依家最貼價層變相為29100至29199點，都有成931張期指，以截至依家10點4分，恒指最高做過29166點計，即29100至29149點呢50點嘅熊證都死晒，呢層有相當於591張期指，換言之，開市半個鐘到恒指已經殺咗2098張期指。
睇返恒指五分鐘圖，見到指數今朝上到暫時高位後回落，依家又落返去50分鐘線(五分鐘圖 x 10線)，SlowSTC(14,3)勢頭向下；換遠少少嘅小時圖，見今日先開出高位「十字星」(嚴格嚟講係叫「墓碑十字星」)，SlowSTC(14,3)都高位向下，呢個圖真心好想開佢淡倉，可恨呢期恒指勢強，開淡倉都只怕爬格仔而已；更重要嘅係，恒指現價踩咗入熊證街貨，今日星期三，仲有兩日就期結日，追數都得返呢兩日時間。
去到10點28分，恒指五分鐘圖由今朝個高位回落之後，落到50分鐘線就咬住唔放，見住個咁嘅圖...唔通恒指噚日絢爛過後，今日回復平靜？都係觀望下穩陣啲。
最後，跟住埋隻5月11日入嘅恒指Put(22380)，由於噚日恒指狠狠地爆上，升穿咗周線圖上嘅10周線，所以(22380)立斬，以噚日(22380)全日高低位$0.174/$0.153計，平均止蝕價為$0.1635，對比當日平均買入價$0.2165，斷臂24.5%...下次呢啲中線嘢再出嘅時侯，大家要截住我呀！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
Patreon：https://www.patreon.com/cbbcwar
秒投輪證教室：https://bit.ly/31HG6AN
