2021年5月17日
上周五美股反彈，主要係聯儲局已有第三個官員開口派定心丸，向市場釋出聯儲局未有收水計劃嘅訊息，減輕市場對通脹引致加息嘅憂慮，美股三大指數回升，港股當晚夜期跟ADR重上二萬八大關，今日終反彈，並隨A股高走。恒指高開102點，半日最多升240點，見28268點半日高位，但仍受制10日線(28294)，升幅一度收縮至46點，見28074點半日低位。恒指中午收報28137點，升109點；國企指數報10479點，升74點；科指半日升110點，報收7676點。內地重磅數據遜預期，通脹及收水預期降溫，港股累跌逾千點後終反彈。
藍籌股以吉利(00175)半日彈4.2%，表現最佳，友邦(01299)半日升0.7%，但其他銀行股喺加息預期降溫下偏軟，工行(01398)更加喺半日成交大增下，股價半日跌1.6%。科網股一直受加息預期所困擾，如今加息預期降溫，科網股總算鬆一口氣，全線反彈。騰訊(00700)升2.7%；美團(03690)升3.4%；阿里(09988)升0.9%；小米(01810)升0.6%，值得一提，本周五恒指服務公司進行季檢，當然市場焦點係完成諮詢後，恒指成份股數目最終將增至100隻，而是次季檢恒指數目或增至60隻，而權重比例上限則下調至8%，ATMX之中，騰訊權重比例將下降，大笨象(00005)跟友邦亦如是，相反美團、阿里跟小米則有機會調高，相關追蹤指數基金亦會應因作調整。至於其他有機會染藍股份，市場有唔少揣測，不過無論邊隻股份有機會被染藍都好，喺目前市況仍未回穩下，今次入場玩季檢似乎值博率唔高。
《民促法》正式發布，政策第十三條直接利好高教+高中(包含非營利性高教+高中)。高教股今早造好，相關股份落鑊，唔少今早升幅閒閒地都有6%以上，唔少缸邊友心郁郁想追貨，阿Man就認為靠邊站穩陣，刻下市況未宜高追。恒指仍未收復多條移動平均線，大市要扭轉目前弱勢，至少要企穩10日線，即28300以上，而28300至28600點之間有個下跌裂口，裂口未能回補，大市仍有向下破底，跌穿27500之嫌。而騰訊將於周四派成績表，騰訊成敗將會影響後市去向。
麥狄文
(徐狄怡‧證監會持牌人)
