2021年5月11日
隔晚美股急轉直下，三大指數下跌，連本來盤中曾升逾300點嘅道指收市亦倒跌，納指跌幅更達2.55%，標指亦跌1%，市場憂慮通脹情緒急劇上升，高增長股，新經濟股被拋售。港股呢邊嘅重磅科技股未能止跌，恒指半日跌逾600點，失守二萬八心理關口。唔單止美國通脹升溫，內地PPI高過預期同樣引發通脹憂慮，唔單止恒指插水，恒科指上半場更爆發小股災，一度跌逾4.5%。
港股今早裂口低開309點，報28286點已經係半日高位，港股其後跌幅擴大，失守二萬八心理關口，一度跌684點，見27910點半日低位，更創自3月25日以嚟新低。半日恒指報收27982點，跌613點；國指半日跌252點，報收10398點；恒科指盤中曾跌4.5%，見7533低位，半日報收7589點，仍要跌3.8%。大市半日成交額增至1094.53億元，跌市成交增加唔係好事。
藍籌股普遍下跌，連金融股亦唔例外，雖然通脹對銀行股嘅影響較少，但整體氣氛受損，邊個板塊亦難逃一跌。科技股裡外受敵，美國擔心通脹重臨，科技股難以維持高增長。加上內地多間科技企業被約談，其中美團(03690)日前被上海市消保委約談，加上CEO又可能衰多口，即使公司已就其帖文解釋，但仍無法令市場釋疑。股價今錄十連跌，半日跌幅更接近8%，藍籌之中排第尾。快手(01024)、嗶哩嗶哩(09626)和百度(09888)創上市後新低，三股繼續向下尋底，暫未宜多手接飛刀，都係睇定啲。如果幾隻重磅股要博反彈，阿Man都係揀返龍頭中嘅龍頭騰訊(00700)，過去長時間騰訊都堅守250日線，要博騰訊反彈，可以用返條250日線，今朝又係去到嗰個位即彈，反彈阻力暫睇600，下個位630至650。資源股今日亦見回吐，急升多日今日借大市急跌回吐亦正常，有心想撈貨都係睇定少少。
今日下半場就算跌幅收窄，亦未宜隨便接刀，暫時市況未穩，大市表現仍反覆，尤其二萬八心理關口可能需要幾日去好淡爭持，阿Man寧願靚觀其變，呢兩日少做少錯，等市況回穩再作定奪。
麥狄文
(徐狄怡‧證監會持牌人)
