2021年3月11日

【盤房來料】鐘擺效應急跌股彈得亦急

美國眾議院通過1.9萬億美元新一輪刺激經濟方案，總統拜登將於周五簽署法案，市場憧憬財政刺激政策，美股做好。另一方面，美國財政部繼續拍債，10年期國債，市場反應尚算不俗，10年期債息亦回落至1.513厘。而美國2月消費物價指數亦低過預期，通脹預期降溫亦是係債息回落的因素之一。不過債息仍然高企1.5厘水平，需要時間令市場接受，債息喺未來一段時間，或於1.4至1.6厘之間上落，難回復過往超低息水平，市場信心方能回復。

由於隔晚只係道指表現較標青再創新高，但納指跑贏升唔起，恒指早段僅高開2點，甫開曾倒跌14點，見28893點半日低，其後發力，重上兩萬九，成功收復50日線(約29084)及10日線(約29136)，曾升504點，見29412點見一周新高。恒指中午收報29371點，升463點；國企指數報11337點，升277點；恒科指升4.5%或366點，報8582點。整體市況有好轉，半場上升股份佔七成，下跌股份佔三成，升跌比例有改善。

藍籌股個別發展，港交所(00388)半日反彈3.5%，大笨象(00005)除淨半日升0.6%，昔日搶息不再，股東難以再好似以前大笨象風光日子，財息兼收。

連升多日嘅地鐵(00066)今日終見回吐，今日派成績表，不過業績都應該係意料之內。創科(00669)跟蒙牛(02319)齊彈半成，前者受惠經濟復甦，後者亦受惠國策，後者較高位回調幅度甚大，現價再見吸引力。

科技股今日繼續反彈，美團(03690)彈力強勁，半日再彈逾8%，騰訊(00700)半日彈3.3%，呢兩日阿Man一直叫要吼住科技龍頭，皆因反彈一定係強者先行。

快手(01024)繼有大行給予其目標價333元後，大摩亦首次叫買，股價半日升逾8%，果然係快手，前日低位250反彈至今，反彈幅度逾兩成，確係厲害。

MSCI延至明日先公布將小米(01810)剔出旗下指數與否嘅決定，小米半日彈3%，但目前仍受美國制裁消息所困擾，希望MSCI高抬貴手，股價有望保住22水平。

其他呢兩個星期插得甚急嘅光伏股跟生物科枝股反彈幅度亦較為顯著，阿Man講過鐘擺效應，插得深亦可以彈得甘，暫時兩個板塊未能確認回復強勢，但叫短線成功尋底，有意入場博一博，可以用早兩日低位作止蝕參考。

麥狄文

(徐狄怡‧證監會持牌人)