2021年3月10日
美國10年長債息略為回落，噚晚財政部拍賣債券成績理想，相信呢幾日繼續拍債會成為國債孳息率變動指標，市場焦點仍然係債息上。而因為債息急債要遭洗倉嘅科技股，隔晚嚟個報復式反彈，納指升3.7%創四個月最大單日升幅，港股今早裂口高開，可惜高開低走，表現仍然反覆。
恒指高開482點，報29255點，成功收復50日線(約29024)及10日線(約29211)，但一開市已屬半日高，開市後即掉頭，A股滬指曾倒跌，恒指亦曾倒跌62點，見28710點半日低位。其後兩地市略為回穩，恒指曾升逾260點，可指受制50日線，升幅再度收窄。恒指中午收報28904點，升130點；國企指數報11111點，升138點；恒科指升288點，報8351點。不過半日成交只有1134億，市場信心仍未恢復，仍受債息高企陰霾所影響。
藍籌方面跌得愈深就彈得愈甘，藥明生物(02269)噚日喺表現最差嘅藍籌，今日雖然未做到藍籌冧巴溫，但亦反彈6%。石藥(01093)獲治癌新藥獨家授權，股價半日升5.8%；蒙牛(02319)反彈3.5%，始終內需股有國策支持，高位回咗兩成嘅蒙牛，從新獲資金垂青。不過舊經濟股見回吐，資金再一次喺新舊經濟股之間輪動。
科技股跟隨納指反彈，但反彈力度遠遠不及隔晚報復式上升嘅納指股份，大部份都高開低走，之前所謂嘅抱團股抱得唔夠緊，北水唔再只買不沽，傾向短線操作，低位撈貨，見彈就食糊。既然明知北水操作有變，缸邊友都要靈活啲走位，當然高位減晒倉，資金鬆動嘅可以見插水就接貨，高位被綁嘅，都要識趁反彈減磅，低位撈貨，炒多兩轉減低持貨成本。騰訊(00700)同樣高開低走，阿Man堅持650樓下先會分段入貨，買貨唔使急。至於半手升6.3%嘅美團(03690)一樣唔急追，堅持310樓下吼位，阿里(09988)220邊收集，三股半日升幅貢獻恒指升咗200點。另一隻阿Man吼實嘅係快手(01024)，有大行首次給予買入評級，半日彈6.3%，吼位270樓下上車，打靶用返噚日低位250失守止蝕，都叫有數圍。新能源股亦見反彈，可措之前高位回落甚深，閒閒地回四成，上面積咗唔少蟹貨，暫時唔係博反彈嘅選項。
唔係阿Man睇死大笨象(00005)，50元呢個重大阻力這麼近，那麼遠，企穩咗45元，又畀評級機構穆迪列入觀察名單，仲要拖埋恒生(00011)落水，反彈之路並不平坦。其他銀行股喺債息回落下回吐，話咗追呢個板塊無着數。
麥狄文
(徐狄怡‧證監會持牌人)
