2021年2月1日
噚晚同我家老爺返去我老爸老媽家食飯，每次返到老家，兩老都大廚上身；連同湊大我嘅婆婆五個人，簡簡單單食餐飯，順便預祝老媽今日正日生日，「老媽，生日快樂!最緊要身體健康！食得瞓得行得走得玩得！」
今朝返公司目的係為咗過農曆新年前執下公司啲地方，依家10點7分，返到嚟都已經幾個字，喺聊天室度已經放底咗恒指同友邦(01299)嘅<追揸沽>策略，兩個都係用小時圖去捉恒指上行。
其實以今朝見恒指牛熊證街貨圖，恒指開市至今現價都係近牛證街貨，不過，以恒指小時圖由上週三(1月27日)至依家，SlowSTC(14,3)都處於嚴重超賣水平，至上週五(1月29日)見有150小時線(1 X 150線)支持，至依家10點25分恒指於小時圖上已重返10小時線(1 X 10小時線)，若然呢條線發揮到支持作用，恒指牛又可以用小時圖哺蛋；否則當係快走一趟嘅恒指牛。
至於隻友邦，上個星期都已經話要bookmark呢隻嘢，事關喺日線圖上見到50天線($94.217)有支持，而SlowSTC(14,3)都已經處於嚴重超賣水平作日勢回升，只係擔心10天線($100.45)跌穿20天線($100.38)生個短期「死亡交叉」出嚟震返個股價再次向下行。
由於友邦日線圖SlowSTC(14,3)都未正式見低位回升，所以做法可以同恒指相約，依家10點41分，先等待友邦五分鐘圖SlowSTC(14,3)掉頭向下至超賣水平先，屆時再留意返小時圖10小時線(1 X 10線)支持力度如何，如果繼續企喺10小時線之上的話，友邦牛(56162)，收回價$86.5，同現價有逾8%差距，距離安全，可以小注出動，放中長線少少釣佢日線圖SlowSTC(14,3)出低位回升；以小時圖10小時圖作為止蝕水平。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
