2021年1月19日

【輪證贏家】忌「心熊」

噚晚覆核緊工作有無遺漏之際，先至知道原來我email入錯咗，搞到喺《信報》miss咗噚日嘅[輪證贏家]；不過，我相信大多數讀者會識得去返[輪證贏家]嘅FB或者Patreon，甚至新開嘅MeWe度搵返條稿嚟睇嘅(Patreon只係部份文章要收費，其餘嘅都係免費，大家可以放心慢慢睇)。

依家9點57分，恒指做完U盤先踩入29100點以上，到正真開市後只係用咗1分鐘就己經推高至29200點以上；再去到大約9點36分，29300點已經成功抵壘，到依家恒指稍為回調後再向29400點出發，截至依家10點正為止，恒指最高做過29417點，升逾500點。

所有個股都隨恒指一支箭咁上，唯獨是搵到隻今朝起跑脫腳，咁啱被我見到，於是成為咗今日聊天室個股<追揸沽>嘅目標，呢隻嘢就係平保(02318)。喺5分鐘圖見大約9點40分低位出「十字星」+SlowSTC(14,3)處嚴重超賣位，眼見隻隻都坐晒火箭上太空，高追又怕，反手又驚，平保咁嘅樣根本就係等同巴士司機埋站未開車，仲要開住度等客，大嗌「等埋」都慳返，跑快兩步仲實際，不求大咬，但求幾格。

再睇返恒指，依家10點15分已經再次上到29400點以上水平，莫講話用平時嘅5分鐘圖，就連拆到用1分鐘圖，搵支針插入去都難。鏡頭一轉，恒指升幅進一步擴大至逾600點，只能夠講句好彩千叮萬囑著聊天室戰友唔好「心熊」(心急地開熊)，否則被北水小粉紅殺到一頸都係血。

10點26分已經見恒指升幅進一步擴大至升逾700點，傳說中嘅今年會出現嘅30000點，唔通今個星期會出現？恒指用咗一個鐘頭時間就殺咗七層熊證，殺咗3069張期指。

日線圖上唯一仍然可取、仲有上升空間嘅就得返小米(01810)，本身上星期五(1月15日)佢大裂口低開後，日線圖上有50天線支持住，如果你話因為佢被列入黑名單而擔心的話，仲有噚日都仲企喺50天線等你嚟試佢(其實上星期五都一早喺聊天室同戰友講定可以揸正股或長Call，好似喺呢度都有講)。今日朝早本來見到小米10天線跌穿20天線出咗「死亡交叉」，但都被小米升8%將條10天線拉返高上去。如果覺得早兩個交易日好似Miss咗小米嘅話，今日等佢5分鐘圖冷靜返之後先至再落場啦。

小米Call(28581)，行使價34.88，有約9%價外，今年7月30日到期，價外Call中屬低引伸、槓桿適中之選。

作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。

MeWe/Patreon/FB/IG：輪證贏家
秒投聊天室：輪證教室