2021年1月7日
美國國會喺當地1月6日嘅國會舉行特別聯席會議，認證總統選舉人團投票結果之際，侵侵支持者喺國會大樓外示威，更闖入國會並演變為暴亂，華府更於當地時間傍晚時間6點起宵禁。不過就算呢個會議搞到七國咁亂都好，都改變唔到侵侵敗選，拜登將主入白宮嘅事實。加上民主黨有機會重奪參議院控制權，全控參眾兩院，屆時有可能加碼刺激經濟方案，美股資金隔晚換馬，沽出科網股換入傳統股，帶動道指創新高嘅同時，納指則回軟。
雖然侵侵留喺白宮嘅日子不足廿日，但佢仍好努力咁繼續向中資企業施壓，紐交所喺財長姆欽施壓下終跪低，決定下周一起將三中資電訊股除牌。與此同時，有消息指美國政府考慮將阿里巴巴(09988)及騰訊(00700)，納入於禁止美國民眾購買嘅中資股名單之中。暫時當局仍考慮緊有關禁制，未有具體決定，但隔晚兩重磅股已喺ADR插水，今日當然冇運行，亦拖累港股喺六連升後回軟。
恒指高開23點，開市後表現反覆，一度升60點，見27752點，但未能升穿噚日高位，喺27800點前見沽壓，一度跌149點，見27542點半日低位。恒指中午收報27571點，跌120；國企指數報10758點，跌141點；恒科指跌254點或3%，報8355點。
藍籌股個別發展，小米(01810)被大行狠削目標價至22元，半日股價質低6%，但仍距離瑞銀嗰個目標價差好遠。講真一句，瑞銀呢個目標價真係無乜參考性，皆因之前瑞銀喺小米未見30元時，已批死小米只值23元，但人家股價坐火箭咁屢創新高，家下將個目標價調低一蚊雞至22元，咁又對小米會有幾大影響呢???
阿Man就深信小米前景無問題，市值一萬億呢個目標亦無變，小米股價接近20日線，大約31元附近，反而係一個上車機會。美國愈打壓，愈多中資股要回歸港股上市，港交所(00388)做獨市生意，坐定笠六無得輸，中金給予其「跑贏行業」，目標價517元，即係較現價仍有超過一成水位。呢啲位仲追唔追，輸得起至好追，定返個止蝕位喺410元，都係膽博膽。
至於受美國打壓嘅騰訊跟阿里半日齊齊跌逾4%，而紐交所彈弓手，維持三大電訊股除牌決定，中移動(00941)半日插7%；聯通(00762)插8.8%為表現最差藍籌；中電信(00728)插8.5%。早兩日阿Man叫有貨嘅苦主要把握跳車機會唔係吹水，絕對唔係馬後炮，廢股繼續廢，長坐喊到無謂，早日斷士斷臂從新做人更實際。.
麥狄文
(徐狄怡‧證監會持牌人)
