2020年11月27日
噚日由一開市就等收市，全日波幅200點都無，只係靠最尾嗰10分8分鐘有少少睇頭，再加上U盤夾上去一下，全日收市先叫做有百零點升幅，被磨足一日嘅我，真係要同你講句：辛苦晒！
今日開市恒指跌61點，開市報26758點；到依家10點12分，恒指跌幅略為擴大至跌84點，做緊26735點。
望望月曆，今日期結；咁當然無人話過期結一定會做好，呢個只係「傳統」嚟嘅啫，不過今日又再出現街貨VS技術分析battle。恒指日線圖上，受林鄭一人之力喺星期三(11月25日)將嚴重超買嘅SlowSTC(14,3)由高位正式見數值回落，至今日已見SlowSTC(14,3)明顯向下，而走勢上27000點亦暫成恒指阻力，下方仍靠10天線(26456點)支持。至於街貨圖方面，今日牛熊雖然都無新增街貨，但熊證仍然都係以近+重街貨最為吸睛，最貼價層27000至27099點之前嘅過千張期指街貨雖然依家變到得返331張，不過喺27300至27399點呢度已重建1592張期指；牛證最貼價層26400至26499點呢度就只有304張期指，點秤，都真係唔夠熊證街貨秤。
望住呢個街貨圖，再望返個月曆，揭下後面嗰頁就醒起原來下個月就係今年最後一個月，即基金們喺今年最後一個跑數月，為咗盤數同生意，慣性12月大市都唔會行得太樣衰，所以又叫「粉飾櫥窗月」，配埋呢個街貨圖...似乎殺27300點重貨熊不是夢。只為安全計，用隻中間價為27300點附近嘅界內證捉呢個不知何年何月先上到嘅目標穩陣啲，恒指界(48009)，上限價30000點，下限價25000點，中間價27500點，區間範圍5000點，出年年底到期。
時近年底，今年除咗又係例牌聖誕節前後放假之外，因為無得去旅行嘅關係，一堆annual leave喺手要準備慢慢清，下個星期開始至年底前嗰一個星期，每個星期都有一日假放，而頭炮就係下個星期一(11月30日)，所以【輪證贏家】同【輪證下半Part】都會暫停一日，聊天室則照常營業。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon/秒投聊天室：輪證贏家
