2020年10月6日
侵侵由中招到出院，前前後後唔使一個星期出院，夠晒戲劇性，除咗喺病緊期間，無間斷發訊息兼工作，再以抗疫勝利者姿態出現，呢鋪或者可以幫佢爭取多番啲選民支持。除咗侵侵出院呢個好消息之外，新一輪經濟刺激方案有望短期內達成，美股受利好消息帶動，顯著上升。港股延續假後首日回升之勢，今日持續高走，但仍受制20日線(24063點)。
恒指今早高開127點，升幅一度縮水至74點，見23842點半日低位，不過缸邊友未知係咪有意喺北水回歸前偷步，又見買盤入場，支撐大市再度擴大升幅至237點，見24005點半日高位，可惜二萬四關再一次得而復失。半日恒指收報23946點，升179點；國指升86點，報收9534點；恒科指回勇，半日升逾3%，報收7322點。
生物科技股今日好精神，甩B孖寶信達生物(01801)跟百濟神州(06160)半日分別升6.4%及7.3%，後者宣布增持合營百濟神州生物藥業股權，盤中更創上市新高，有貨呢對孖寶要坐定定。之前輝瑞高溢價入股嘅基石藥業(02616)半日升8.2%，睇嚟有機會去番宣布入股當日高位12.98元，即管睇睇有冇本事修復假期前枝大陰燭。其他生化藥股普遍做好，升幅閒閒地2%以上。
恒指服務公司宣布11月再作指數季度檢討，而相關成份股調動會喺12月7日實施，上次美團(03690)失落藍籌股寶座，今次有望順利染藍，沉寂咗一段時間嘅股價，今日顯著上升，走勢回勇。至於其他具內需及消費概念股今日亦見資金追捧，阿Man除咗睇好海爾電器(01169)之外，體品股同埋乳品股龍頭亦值得留意。
蘋果將於呢個幾兩個星期內，舉行iPhone12發布會，手機設備股吸引資金流入，舜宇(02382)漲3.3%；瑞聲(02018)揚5.4%，不過阿Man都係偏好比亞迪電子(00285)，話晒上面冇蟹，股價任佢行，相反一對藍籌手設孖寶，層層蟹貨，至怕急升一日又無影。至於晶股今日有反彈，中芯(00981)及華虹(01347)半日分別反彈8.4%及4.5%，但係中芯剛剛承認被美國封殺，始終喺中美爭拗刀口上，阿Man認為無謂將自己推向一個咁高風險嘅位置之上，晶片股暫時玩唔過。而當日阿Man指中芯上市科創板後，港股嘅H股任務完成，創新高當日亦係逃生之時，當日阿Man保守估計中芯要落番30元樓下，結果去到25元先識停，受美國封殺影響，日前更跌穿廿皮水平，講真高追唔肯走又輸四五成。
麥狄文
(徐狄怡‧證監會持牌人)
