2020年9月7日
上周四及五美股顯著下跌，雖然今晚美股休市，但市場憂慮美股假後跌勢未止，今早港股好淡爭持，暫時喺條100日線(約24648)附近上落。恒指今早低開74點後，最多跌93點，見24601點半日低位，其後中國8月出口增長數字好過預期，大市掉頭向上，曾回升212點，見24908點半日高位。不過市場始終憂慮美股周二假後復市唔知乜嘢環境，大市升幅縮水，恒指喺100日線爭持。恒指中午報收24708點，升13點；國指則跌45點，半日報收9838點；恒生科技指數半日跌253點，中午報收7334點。
重磅藍籌股只有友邦(01299)表現最突出，半日升3.8%，撐起大市，其他重磅股唔多精神神，騰訊(00700)半日跌0.3%，大笨象(00005)跟中移動(00941)亦跌少於1%，而港交所(00388)跌1.2%，至10日及20日線之下。吉利(00175)自公布回歸A股上市後，股價搞咗個幾兩個月，都仲係16元至18元之間上落，8月份銷量升12%，半日彈番1.5%，都係冇乜睇頭。三隻染藍恒指新貴，只有小米(01810)半日升1.3%，阿里(09988)跟藥明生物(02269)齊齊跌逾1%。小米剛公布以24.5元行使價發行option畀管理層，年期係長咗啲成10年，不過用得呢個位做行使價，公司對未來前景有一定信心。之前阿Man都預咗小米股價定必創新高，要上30元亦無難度，長遠睇小米要衝破萬億市值並非得個講字，小米見萬億市值，即係股價要見40元樓上，呢隻跟ATM一樣，係長坐長升股之一。
美國對內地企業打壓未有放軟手腳，除咗非上市公司華為被窮追不捨之外，有消息指中芯(00981)或被美國考慮列入貿易黑名單，更有大行建議沽中芯，股價半日跌近兩成。自中芯A股掛牌後，基本上中芯已經無運行，股價見頂後回落，阿Man沿途都提醒大家咪多手接刀，即使股價由45元回落至30元，睇落回吐唔少都買得過，但缸邊友有咁嘅諗法時，理性少少倒睇番前面望望，中芯其實由十幾蚊起步炒高，30元都已經升咗一倍，唔好以為高位回咗十幾蚊就覺得好抵買。中芯大跌拖累整個半導體板塊插水，暫時呢個板塊不宜沾手。
華為一方面畀美國制裁，另一方面有消息指Mate 40手機大削訂單三成，跟主要競爭對手蘋果公司剛剛相反，人哋加單佢減單，消息拖累其他手設股捱沽，之前阿Man又係講咗N次，喺舜宇(02382)跟瑞聲(02018)未跌定嘅時候，又係咪多手接飛刀。
除咗成份股新貴較矚目，今日港股通納入多個新成員，阿Man一直有推介嘅信達生物(01801)跟上周喺42元水平推介嘅海吉亞醫療(06078)半日股價勁升，有貨不妨再坐一會，但無貨再高追，自已要好好衡量風險。
麥狄文
(徐狄怡‧證監會持牌人)
