2020年4月24日
美股隔晚先升後回，早段因為油價反彈及眾議院通過逾4000億美元救助方案做好，但其後卻因為有關瑞德西韋對治療武漢肺炎效用成疑，有藥醫變冇藥醫，嚇親華爾街人，令美股由升轉跌。港股早段低開，但喺油價持續反彈下回穩，跌幅收窄。
恒指低開132點，早段曾跌246點，見半日低位23730點，一度失穿20日線，其後逐漸回升，20日線失而復得，跌幅一度收窄至只有20點，見半日高位23957點。恒指中午報收23911點，跌65點；國指則跌17點，報收9686點。
油價反彈帶動石油股反彈，中海洋(00883)半日逆市升1.6%，係表現最佳藍籌，不過阿Man講過好多次，油價只有波幅，難有升幅，喺原油供求乃然失衡，石油倉儲接近飽和，油價仍然係易跌難升，阿Man對於石油股繼續採取漠視態度，短線升升跌跌照舊無眼睇。
其他重磅股窄幅上落，平保(02318)公布季績後被削目標價，半日跌逾1%，暫時仲守得住條20日線。騰訊(00700)半日跌0.6%，騰訊已企穩喺405元南非價之上，只要騰訊股價仍守403元及400元心理關口，騰訊仍維持強勢。其他藍籌股今日普遍回吐，半日成交縮水，同周末前夕有關係。
軟件股今日回吐，金蝶(00268)今早錄得大手上板，有外電指京東旗下子公司配售金蝶股份，半日跌7.3%；而金山軟件(03888)則發行31億美元CB集資，半日股價亦跌7%。其他軟件股及科技股腳軟，市場擔心呢個板塊集資活動陸續有嚟。留意阿里巴巴(09988)半日成交躍至第一位，大成交下股價跌2.6%，唔排除主要股東軟庫隨時減持手上股份。純以盤路睇，阿里巴巴都似似哋要配股，短炒阿里巴巴嘅缸邊友可能要先迴避。不過阿Man一向睇好長線嘅阿里巴巴，如果係長線投資嘅話，出出入入無乜意思，反而趁配股時股價受壓，可以考慮低吸。
今年新股上市活動因為肺炎疫情大大減少，而康方(09926)係目前為止嘅凍資王，股價表現自然有番咁上下，噚日盤暗最多升逾五成，今日半日市亦升47.1%，半日收23.8元，剛好喺半日成交匯聚區中間。對於新股走勢好難捉摸，都係跟勢炒，無乜基本因素同技術走勢可以分析。
麥狄文
(徐狄怡‧證監會持牌人)
