2020年3月17日
恒指今日就係咁「跌升跌升跌升...」今日大部分就係咁好淡爭持，「弱勢股指數」升至73附近頗高水平，超賣下沽壓可能收歛少少。焦點股係騰訊(00700)，明日放榜要睇路，最好勿持貨尤其是輪證至業績公布。此外，弱勢股指數顯示騰訊連續四日都歸類為即日弱勢股，作為僅餘三隻仍處勢頭綠燈的藍籌股，其餘兩隻為恒安(01044)及中生製藥(01177)，騰訊受廣告欠佳及投資方面賬面失利，小心強勢隨時不保。
即日在收市直播已指聯塑(02128)似遭機構投資者出貨，小心空手接落刀，今日更大跌一成二。龍頭物管股亦有類似情況，碧服(06098)明日放榜前再插半成，25元重要支持不宜明顯失守，否則先下試50周線約22.7元。
目前策略一定要當典型熊市看待，甚麼股票也好，先從最壞角度打算，最好當然是抽離一下。好似今日中國恒大(03333)急跌9%，要對內房美元債本月底到期高峰做好心理準備，隨時會有不利消息影響板塊氣氛。所以，若一定要撈貨，我會以ETF為首選，避開單一公司出現突發負面事件的可能。
羅崇博 (杜比)
