You are currently at: stock360.hkej.com
Skip This Ads
  • 恒生指數 22410.80 430.82
  • 國企指數 7554.37 135.97
  • 上證指數 3533.79 43.83

2019年7月9日

【輪證贏家】恒指升勢「壽終正寢」

噚日揀咗隻恒指熊(50462)出嚟,喺上半場11點45分至完場時恒指5分鐘圖SlowSTC(14,3)上到超買位,當時(50462)高低位做過$0.08/$0.079,平均買入價$0.0795。講緊係呢個位入咗超買之後,到下半場開市恒指又再冧過,到1點25分至2點5分,恒指SlowSTC(14,3)都keep住喺30樓下呢個位,如果做即日鮮,係呢個位度走隻(50462)嘅話,按呢段時間(50462)做過嘅高低位$0.088/$0.083,平均賣出價就係0.0855,不消三個鐘即日平均賺幅為7.5%。

即日鮮嘅話噚日走完咗呢一轉基本上可以熄機,但如果想走多轉過夜嘅話又如何?噚日喺[下半part]講過可以等3點半至收市前呢半個鐘,等恒指5分鐘圖SlowSTC(14,3)再出超買時落場,不過,最終喺3點20分至35分,恒指5分鐘圖SlowSTC(14,3)已經上到超買水平,按呢段時間(50462)高低位做過$0.08/$0.077,平均買入過就係$0.0785。

依家9點49分,係林鄭終於出嚟講嘢而又唔多想聽時,開恒指圖睇,睇恒指比今朝早我坐巴士返緊公司時跌得多咗,依家做緊28183點,跌147點,恒指5分鐘圖SlowSTC(14,3)見觸底準備反彈,(50462)證價$0.089即走,用返之前計落嘅平均買入價$0.0795計,賺幅11.9%;如果按5分鐘 SlowSTC(14,3)落到超賣水平計,其實喺9點50至依家9點53分都仍然處於超賣位,呢段時間(50462)高低位做過$0.093/$0.088,平均買入價係$0.0905,平均賺幅有13.8%。

依家9點56分,恒指都係做緊282XX點呢啲位,下方仍然有100天線(28162點)同20天線(28173點)支持住,係嘅,咁睇恒指就仍然處於保歷加上升通道裡面,不過SlowSTC(14,3)勢頭向一頭向下在話下,14天RSI亦由上個一期6X回返落去中軸水平,MACD嘅DIV趨向負數區,而同步牛區見「熊差距」,技術指標上已經發出向淡訊號。

再睇埋恒指牛熊證街貨圖,依家10點1分,恒指跌幅有所收窄,至跌36點,做28295點,最低暫時見過28156點。牛熊證街貨圖上見下方牛證最貼價係28100至28199點,呢度有相當於631張期指,比噚日多咗333張,按恒指暫時出過嘅低位計,呢一part已經有部份牛證死亡,再向下一層,即28000至28099點,噚日小妹就估呢一層會成為一個重貨區,皆因整點數關口係會有多啲人願意守住,今日再睇,呢一層新增街貨係最多,有622張,但整體都只係得828張期指,重貨區仍然都係27700至27799點,有相當於1192張期指。

睇者上方熊證,極有可能係噚日恒指急挫下,有唔少熊證選擇收割唔等,搞到依家頭五層熊證街貨嘅期指張數,夾埋只得562張。至於最重位就喺29000至29099點(嗱,又係整點數關口呀!),有相當於944張期指。

依家10點9分,其實就算恒指跌幅比頭先走(50462)時細咗,但心算都計到恒指現價仍然都係向下方牛證街貨。就認真計一次,牛熊街貨中間位(即用牛熊各自第一層最貼價嘅門口位拉個中位數:(28199+28500/2)=28349.5),依家恒指見28252點,兩者相差97.5點,係貼但中未到。更何況上方啲熊證街貨「寸草不生」咁款,比著你去搵食嘅,都唔會去呢啲地方啦。

睇嚟恒指6月份嘅升勢,喺7月未能接力之餘,仲應該「壽終正寢」。追跌係想嘅,不過依家唯一要考慮嘅係呢條20天線/保歷加通道中軸,會唔會成為恒指短期嘅「安全島」啫;恒指熊(50608),收回價28700點,同現價有逾400點差距,約51倍槓桿比率算高,揀定出嚟只係以備不時之需,始終見恒指今日開市後呢一個鐘chok嘅幅度都唔細,小心為上。

作者阿珊,任財經/投資版傳媒人十幾年,《鐘擺戰策贏港股》作者。用技術分析專心玩輪證,唔貪心,志在搵餐下午茶。

電郵:[email protected];Weibo[下半part]:#Gladyshan#

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。

信報財經新聞有限公司、香港交易所資訊服務有限公司、其控股公司及/或該等控股公司的任何附屬公司、或其資訊來源及/或其他第三方數據供應商均竭力提供準確而可靠的資料,但不能保證資料絕對無誤,且亦不會承擔因任何不準確或遺漏而引起的任何損失或損害的責任。

建議瀏覽器: Chrome, Firefox, Safari, IE9或以上

信報財經新聞有限公司版權所有,不得轉載。
Copyright © 2026 Hong Kong Economic Journal Company Limited. All rights reserved.