2019年2月27日

【輪證贏家】29000點真係破唔到?

依家10點3分，應該仲有不足一個鐘到財爺就開始宣讀佢份《財政預算案》，頭個15分鐘都應該一如以往有啲議員抗議一下，都好，咁即係我仲有多15分鐘去做埋其他嘢先至再處理份《財政預算案》；搞乜嘢？今日港交所(00388)同新地(00016)業績呀！

噚日下半場見到恒指個勢好似愈跌愈有咁款，所以就喺[下半part]話唔通粒「十字星」顯靈？哈哈，若然好積極咁去追Put/熊證嘅話，拆返開條5分鐘圖見，其實講緊去到臨收市前個10零分鐘先見到SlowSTC(14,3)上到超買水平，即係話無靚位入市啦；既然無，梗硬入又何必呢？

睇返今朝恒指開市報28833點，升61點，暫時最高見過28936點。再開埋恒指牛熊證睇，上/下方最貼價個位同噚日一樣，熊證仍然都係29000至29099點；而下方牛證就係28400至28499點。用依家10點18分恒指現價28872點計，唔使用計數機都計到上行去殺熊證近過下行殺牛證啦，不過呢兩行街貨數量同噚日睇有啲唔同。

噚日喺29000至29099點呢度有相當於417張期指，而下方牛證28400至28499點就有834張期指。去到今日呢兩層街貨相當於期指嘅張數分別為720張同888張。留意返，噚日睇就牛證明顯多過熊證，但今日見兩邊嘅街貨都只係相差168張。既然上行點數少且街貨數量多嘅話，何不唔開隻Call/牛跟上殺熊呢？留意番今日係期結，往往期結都係有一個「美好嘅結局」；再加上港交所今日公布業績，大家都估佢會交到一份養眼嘅成績表出嚟，若然如是，「恒指因港交所業績造好而再推升」可能會變成今晚或者聽日嘅新聞大題。

進取嘅可吼恒指牛(65537)，收回價28514點，同現價有約380點差距，64倍槓桿力勸有心臟病嘅人唔好掂；血壓高既就可以揀恒指牛(62206)，收回價28288點，同現價有逾600點差距，槓桿約46倍係同一組收回價之中最高槓桿嘅牛。同以前一樣都係吼5分鐘圖見超賣先好小注落場，以快打慢為主。

最後，好多謝大家噚晚出席講座，連友欄杜比同我個位乜輪都唔識嘅舅父Eric都有嚟捧場；亦都好開心見到好多【輪證贏家】嘅讀者，email傾偈就傾得多，終於可以見到大家，多謝Mansion到場，多謝Ka Ming比錢買我本書，多謝一直都關注Weibo嘅女讀者，更多謝Rila送比我嘅禮物，非常之實用同貼心。可能噚晚係我第一次咁樣企出嚟做一個talk，講得唔好，但我都好希望之後再有機會同大家見面，同大家一齊傾吓偈！(其實促成呢件事嘅係高盛嘅Gary同Daniel，多謝兩位！)

作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。

電郵：[email protected]；Weibo[下半part]：#Gladyshan#