2019年2月8日
恭喜發財！身體健康！唔使OT！升職加薪！百發百中！請假Easy！仔囡聽話！老細唔煩！總之想嗰樣得嗰樣啦！
依家9點40分，坦白講又唔係話我唔想咁早返到，而今日真係無乜人返工，條隧道4分鐘就行完出觀塘，咁我又有無可能唔呢個鐘數返到公司呢？！最正就係喺門口嘟門入去時(因為公司是玻璃門嘛)隔住塊玻璃已經見到我同事Cyrus咁啱喺Pantry斟完水行出嚟企喺度等我開門，Well，一年一度，開心嘅。
不過今朝見到恒指開市可能大家就會有啲唔開心，事關可能都會有人博農曆年開個紅盤出嚟，誰不知今日恒指開個黑盤(呢個名都真係好少人會講，以前都仲有，依家會避開話「未能紅盤高開」類似嘅說話，始終新年嘛)，今朝開市低開282點，做27708點；依家9點49分，恒指進一步下跌至27665點，跌緊324點。日線圖上見到恒指今日一個裂口下跌，仲被條10天線(27594點)好似「篤魚蛋」咁篤穿過粒燭；與此同時，今日一跌，下方啲技術指標全數掉頭向下，發出看淡訊號。
猶記得放假前恒指牛熊證街貨圖上，熊證區都有唔少重貨喺度駐守，事關大市呢趟超買實在超買得太耐，搞到有好多錢已經唔耐煩咁先入熊證博調頭，但可惜愈博就愈啪，但仍然有一班人未放棄。今日再睇，第一同第二貼價嘅熊證夾埋先得58張期指，去到第三層就有成1430張期指，而呢度就係28200至28299點，但你見恒指今日裂口一跌，同呢個位都有成500至600點差距，確係有啲遠。
至於下方第一貼價就係27600至27699點，呢度有相當於63張期指，以依家10點4分恒指最低做過27534點計，呢63張期指就等同一個早餐或者頭盤；「咁午餐/主菜梗係27500至27599點呢？」如果以暫時個低位嗰34點未殺到落27500點嚟講呢，咁又真係未嘅，不過呢層嗰745張期指其實都應該凶多吉少。
若然個市再向下殺，誓言殺重貨嘅話，咁就要落到27100至27199點，呢度有1224張期指，同現價(10點10分報27640點)嘅距離就有540點。咁睇其實恒指無論上行定下行，所行嘅點數都係差唔多，換言之你可以話佢係企喺中間位，兩個字：兩難。
反正今日大年初四，都應該仲有人放緊假，打算去拜吓年或者拜吓神，甚至上個星期已經飛咗去旅行避年，今日個市就唔好睇佢住囉。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo[下半part]：#Gladyshan#
