2019年1月29日
依家9點52分，無錯，我今日返工啦，不過做完一個朝早嘢就算，事關我今日連聲都無，返嚟個原因都係有啲嘢確實要喺公司處理。
未出門口之前已經見到日經跌接近200點，可能又係同華為單嘢有關掛；坐巴士時見到恒指做完U盤，望一望跌17X點；到返到上嚟office坐低，一度跌逾200幾點。到依家10點4分，同Marketing同事傾完一輪之後，見到恒指跌幅收窄至跌163點，做緊27413點，而噚日本來話唔寫但最終都寫嘅[下半part]，仲計埋恒指Call(22355)喺可以入到市嘅兩個位(朝早平均買入價$0.0585/下晝平均買入價$0.0555)計個平均買入價$0.057；而依家(22355)輪價就做緊$0.049，暫輸八格。
仲有無得守就真係要再睇睇恒指牛熊證街貨圖，下方牛證愈出愈貼價，講緊依家牛證第一梯係27100至27199點，呢度有相當於455張期指，同現價(10點18分報27396點)比，只要大市由現價下行多296點就可以落晒455張期指；若然再落多100點，即係27000至27099點呢度，咁就有多732張期指食到。
上方熊證又點？重貨就不在話下，但基於噚日彈升完之後個市回一回，到今日直頭下行，現價同第一梯隊已經有一段好大嘅距離啦，上方27800至27899點講緊要現價反彈503點先至可以食得晒第一part熊證，要咁多點數去上都唔會要你蝕嘅，因為講緊呢度有1317張期指喺度等緊你。
依家呢個位就真係麻煩啦，下行近但貨少；上行遠但重貨，本來呢啲位一向都唔會落場嘅，但噚日手快又落咗喎，點搞？繼續以快打慢兼博一博阿爺會開聲救華為囉(但都要睇住條10天線(27158點)做人)。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo[下半part]：#Gladyshan#
