2019年1月28日

【輪證贏家】28000點又見重貨

依家10點38分，係呀，我又sick leave啦，今劑以為普通流感，原來係扁桃線發炎，怪不得我連嘢都講唔到，我都唔知會唔會傳染，但求上個星期五(1月25日)同我食飯嗰三位人兄(友欄杜比、帶我哋食好嘢嘅Andy同埋新相識嘅輪商朋友Carol)無事啦。btw，多謝Carol嘅利是封同埋隻豬年公仔，一個中國風design嘅利是封，即刻feel到農曆新年嗰種氣氛。

上回提要就係隻恒指Call(11718)幫我成功報仇，而今朝恒指再見升勢，開市先升126點，報27695點，最高暫時見過27790點，如果上個星期五堅係好似[下半part]所講，入多次隻(11718)或者其他Call/牛證，相信你都可以買多盒蘿蔔糕過年。

雖則依家恒指喺日線圖上呈「十字星」，但上半場都未過，真係唔好咁快下定論，睇埋恒指牛熊證街貨圖先再講。以今日暫時做過高位計，大市已經將27500至27599點同埋27600至27699點呢兩part熊證街貨全數掃清，呢兩層夾埋有相當於1740張期指。至於27700至27799點呢度嗰1109張期指，都已經被八八九九，基本上你都可以當佢唔存在咁滯，即時加埋上去，今朝你可以話個市已經掃咗2849張期指。

以依家殺熊嘅速度「快過中流感」嘅情況下，下方牛證就算出更貼價嘅證都無乜用，依家下方牛證先開始上到27000至27099點呢個位置，同現價(10點55分)27708點比，都仲有成700幾點嘅距離。至於上方熊證最近我當係27800到27899點，呢度已經有1125張期指喺度等緊你，重點係喺28000至28099點呢度有1353張期指，you know，呢part係重貨區嚟架。

再睇埋恒指日線圖，除咗條250天線(28527點)之外，恒指現價都企喺餘下嗰四條線之上；換保歷加通道睇仲high，high在成條保歷加通道口繼續拓闊都未夠，索性成條腸粉(我真心覺得保歷加通道好似飲茶嗰啲蝦腸、叉燒腸或者牛肉腸，將啲料(陰陽燭)包住，間中你會見到有啲莞茜係面好似就跌出嚟，就好似有時升/跌得勁得滯，穿咗條腸粉咁)向上移，比更多嘅空間個市走動。恒指Call(22355)，行使價28000點，屬輕微價外Call，實際槓桿約17.8倍為同一行使價中最高槓桿，成交活躍不在話下，輪價細都係另一個賣點。

最後，今日[下半part]暫停一日，真係唔唔想病住過年(我好似年年新年都要病一劑先安落)，抱歉。

作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。

電郵：[email protected]；Weibo[下半part]：#Gladyshan#