2019年1月17日

【盤房來料】重磅股輪到平保再發力

美股開始踏入業績期，隔晚高盛跟美銀都交出一份好過預期嘅業績，美股唔理會聯邦政府繼續局部停擺，隔晚三大指數再升，帶動夜期跟ADR噚晚做好，恒指順利挑戰二萬七大關。大市今日略為高開後，隨即倒跌最多近200點，低見26703點，但隨住A股扭轉跌勢，港股亦能拗腰，其後更升穿開市價，最多升110點，見27012點，半日報收27000點，升98點；國指則升50點，報10605點。

畢竟大市由二萬五水平反彈至今，累計升幅已二千點，喺未見資金顯著增加，以及未有重大利好消息刺激下，港股升勢已開始拉牛上樹。重磅股當然又係靠騰訊(00700)帶動指數，騰訊成功企穩300元樓上至今，阿Man一直睇好，而原定目標價335至340未變，現價已接近完成目標，無貨當然追唔過，有貨考慮食糊亦好正常。

阿爺唔單止出招為下行壓力大增嘅中國經濟護航，國務院批准將QFII總額度倍增至3000億美元，擺明係為咗A股打打氣，即使外資呢一刻未見加大馬力，但意義上確能提振A股。而今年MSCI將加碼納入A股，富時指數亦有機會落實納入A股，所以中國經濟前景再淡都好，A股未必死到直一直。A股有起色，除咗之前阿Man推介過嘅內地券商股受惠，內險股亦水漲船高，之前平保(02318)跌到落65元死死吓，呢個幾星期走勢逐步好轉，股價重上70元企穩後，短線料可向75元出發。

噚日阿Man講過內地醫藥股有大行唱好，加上股價較高位大幅調整後，估值開始變得平易近人，可惜係上面個個位都大把蟹貨，升至日線保力加通道頂可能又要抖氣。龍頭之一嘅中生製藥(01177)今早增跌2%，但其後又見買盤吸納，股價半日倒升逾5%，為半日表現最佳藍籌股，果然係抖一抖氣又衝過，另一龍頭石藥(01093)半日亦升逾3%。兩股若然有心搭轉順風車，咪寄望快車一架一步到位，中線持貨畀耐性趁回吐吸納。

至於期指都係睇住26800呢個位，企得穩當然繼續做好，不過27000至27300點阻力唔細，升抵上月高位只為挾爆淡倉。牛熊證街貨仍然側埋一邊，今日kill完26900至27099嘅熊仔，即管睇睇下一重貨區27300至27500點仲有冇淡友加碼，若然淡友繼續落力沽，大戶就只係睇住嚟食繼續挾。

麥狄文

(徐狄怡‧證監會持牌人)