2019年1月8日
噚日介紹過吓隻SPDR金ERF(02840)個樣好Put，之但係市場上就只得一隻Put輪，熊證欠奉。基於個市上行無力(ADX喺市升時下行)；下行又同牛證街貨遠嘅情況之下，一係就貪得意paper trade吓隻S金Put，一係就搵一啲就冧就冧嘅個股，好似中國移動(00941)咁望住先，再唔係就等於中美貿易戰傾成點之後再作打算。如果揀paper trade隻S金Put嘅話，應該悶死咗；中移噚日呈「T星」，依家(9點45分)，「T星」再現，同時DMI嘅+DI有遇頂回落跡象，只係SlowSTC(14,3)嘅%K線已經上到「9」字頭，依家就等埋條%D線由「6」字頭再追上去超買水平，就等埋博佢回；如果等中美貿易戰傾完之後先再作打算嘅話，咁應該所有嘢都唔關你事。
依家9點52分，恒指本身今朝開市跌17點，暫時最低見過25688點，開埋恒指牛熊證街貨圖睇，下方牛證出咗唔少新嘢，將個打靶位推到近返個現價好多，講緊第一梯隊嘅牛證街貨喺25500至25599點，呢度有相當於451張期指。至於上方第一梯隊就係26000至26099點，呢度有536張期指。其實望一望個街貨圖你就知道上方嘅熊證同現價雖然有啲距離，但每一part講緊都有幾百張期指喺度；相反，下方嘅牛證即使同現價係近啲，不過頭先講嗰451張期指已經係重貨架啦，再數落去嘅街貨其實都只係得幾十張期指街貨咋，有兩層甚至係0街貨添。
依家10點3分，後背開住電視睇緊林鄭個live，而依家恒指跌幅講緊得25點，做緊25810點，日線圖恒指今日喺踩住條20天線(25775點)，所以即使用保歷加通道定平均線睇，都仲未見到有咩明顯嘅方向，喺呢啲咁悶嘅時間又無乜行情嘅時候，最好就係望一眼恒指波幅指數(VHSI)，一開就見到條VHSI依家報21.5，計埋今日已經由高位27開始出現四連跌，仲要頭嗰兩日都係大陰燭咁落，去到呢啲低位，再加上下方有條150天線(21.309)支持住，有機會成為一張彈床，咁亦即係話個市好快就會有一場大波幅嘅走勢出現(唔一定係腥風血雨嘅，可以係火紅火綠嘅，VHSI只係代表波幅嘅幅度，而唔係上定落)。
唔通真係等埋「雲尼the寶」(曾幾何時有人問我Winnie the Pooh嘅中文名係乜，我參考咗Google translate嘅翻譯方法：Winnie=雲尼；the咪就係the囉；Pooh=寶(唔好點解，我都唔係好知)，「雲尼the寶」就係咁樣譯出嚟)同埋Simpsons傾成點先有定案？依家10點20分，恒指波幅點仍然好低，呢個時候買升/跌亦係同去賭場買大小係無乜分別，睇嚟又要悶一日啦。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo[下半part]：#Gladyshan#
