2018年12月19日
噚日本來見到隻中國平安(02318)日線圖殺到落保歷加通道底兼SlowSTC(14,3)準備反彈，於是就揀定隻平安Call(13606)出嚟，睇吓有無計又有無位可以落到落，小注一博佢會觸底反彈。
正當以為個市以龜+樹懶mode去行嘅時候，失驚無神恒指向下衝咗落去，先係為前日隻恒指熊(69755)唔抵，繼而已經唔記得咗要留心隻平保，於是噚日成個下晝就係睇住個市一插插咗200幾點之後就橫行，直至收市，而噚日全日成交額就只有679.9億，真係辛苦晒。
今朝見日經都係跌緊，本以為今日個市都繼續下行，反正噚日都見恒指似係殺落去25500至25599點同25400至25499點呢兩part重貨，誰不知今日先升46點開市，到依家9點50分，恒指升幅擴大至65點，做緊25879點；但又似乎好似上到呢個位就停咗喺度，無他嘅，事關今晚美國議息，幾乎整個地球都落重注今次儲局會加0.25厘，特朗普再喺twitter講乜都無用。
望多眼牛熊證街貨圖，頭先講嗰兩part重貨，今日睇返期指張數又重回過千張水平，呢兩個位夾埋有成2435張期指，而呢兩個位講緊係同現價第三同第四貼價嘅街貨區，至於頭第一二part重貨，夾埋都有成810張期指。如果，我話如果，今晚美聯儲宣布加息0.25厘(係預咗我知)，之後再整多件議息聲明，暗示/明示出年又繼續係咁加息嘅話，哼，都真係難保個市會唔會趁機向下插落去，一次過食呢3000幾張期指嘅貨，然後就真係安安落落過聖誕同新年啦。
真心，年尾無水確實係等出年先至嚟過，不過都唔排除有手痕友，恒指熊(68809)，收回價26738點，同現價有逾800點差距，夠安全，槓桿比率約26倍適中，街貨又唔多，係出年3月底到期，咁短線都OK嘅。小注落場，無時間、唔得閒、唔想睇嘅就咪落場，真係等出年先再算啦；【輪證贏家】都做埋今個星期就收爐啦，個市靜到咁，鬼寫到文咩。
電郵：[email protected]；Weibo：#Gladyshan#
上一篇：威勝夥阿里雲IoT戰略合作
