2018年12月14日
噚晚睇住電視歐央行確認本月起停止量寬買債，德拉吉話歐羅區經濟唔太好，美股反應都係一般，只係小型股的羅素2000跌1.5%比較衰。不過美股收市後有三件事，一係Bitcoin插至15個月低，反映風險胃納大減；二是共和黨控制的眾議院表決通過議案，要求美軍撤出對沙地聯軍對也門軍事行動嘅支援，等於一巴摑落一直支持沙地嘅特朗普；第三件事係今朝日本央行在例行操作減少購買總額200億日圓2至5年期短債，觸動投資者對全球央行收水憂慮的神經。道指期貨跌近200點，日股今日收市插2%，港股將過去三日升幅回吐超過一半，都幾令人意外。
近月我一直話美股唔頂得幾耐，繼羅素及納指之後，最近連標普500都近出現埋50天跌穿200天線之長線死亡交叉，至於道指，相信年底及明年初都會出死叉。之後美股好大機會會一彈就散，至少回落到500天線先企穩少少。道指500天線目前約23450，即係有千一點潛在跌幅。
恒指算係比道指好，不過個股就超難玩，往往隊到好深、止蝕完後才來個大反彈，你以為可以跟一轉嗎？點知又中伏！中燃氣(00384)呢兩日似模似樣，點知貪心小小都唔得，今日竟然跌超過6%俾你睇，唔少股進三步後，一退就是兩步。水泥股也難玩，之前突質低，話旺季不旺價，噚日急彈又引你買！
恒指始終未有跌穿11月21日低位25494，今日筆者買了少少恒指牛，收回價24377點，純技術希望年底前維持10月底以來上升通道。明年第一季會轉打守勢波，特別睇實信貸違約掉期(CDS)，港股不排除做另一隻腳。
別對中央經濟工作會議有期望，寬鬆的訊號一定不會好強烈，北大人深明以前「一放就亂，一亂又收，一收又死，一死又放！」再不會一刀切，只會對症下藥，精準調控。今次極其量重申支持民企，解決融資難嘅問題；至於內房寬鬆，都是個別較低級城市，不過如果無重申「房子用來住，不是用來炒」，市場借機又會有猜想。
羅崇博（杜比）
