2018年10月8日

【短線出招】騰訊短期底睇292元

過去幾次人行降準A股都係要跌，今次都唔例外，投資者認為潛台詞係內地經濟轉壞情況可能比預期差過，寧願冒著人仔再貶值，都要揼水放棄去槓桿。更可況，A股在國慶假期之前已經反彈咗唔少，滬指由2644升到2827，今日一吐便是反彈幅度的62.8%左右。短期又要睇2638點前有冇養老基金「抄底」。

騰訊(00700)今早300元未算擺出散戶血肉長城陣，大家都係等睇戲，今日低位299.8時，14天RSI約32，仍然未超賣，更加唔及得8月初及8月中般慘烈，玩Swing仲要等等。上次9月12日低位305.2元較8月16日的319元低位之跌幅是4.3%，若以此伸算，今次短期底部在292元附近會較合理。

再講恒指，今日人人等穿底，筆者今日亦跟友欄阿珊玩恒指熊(61460)操作買入，收回價27588，明年1月底到期，今日升幅逾三成。依照之前恒指兩個底部，即9月12日的26219及8月16日的26871，跌幅2.4%，伸算今次底部是25581左右，屆時恒指RSI亦會跌穿30，才是另一次博反彈機會。

羅崇博 (杜比)