2018年10月2日

【盤房來料】十月開局急挫預示走勢凶險

港股踏入第四季，國慶假期後首個交易日出師不利，除咗係美滙指數高企95，加大新興市場走資壓力外，內地9月PMI差過預期，更逼近50點好壞交界處，令市場憂慮內地經濟下行壓力增加，港股再成為提款機，恒指連跌五個月後，10月開局繼續向下，半日急跌逾400點。

恒指低開72點報27716點經已係半日高位，即失50日線(約27772)，其後再失10日線(約27501)跌，最多跌463點，低見27325點，暫時險守20日線(約27278)。中午恒指報收27333點，跌454點；國指則跌190點，報收10827點。內地股市黃金周假期，至下周一復市，本來少咗內地市場阻手阻腳，唔少缸邊友都認為港股有機會再挾淡倉，奈何二萬八點阻力大得驚人，大戶亦懶理28000至28299點已囤積超過三千五百張期指嘅熊證街貨，借勢先向下屠殺27300至27499嗰過千張牛證街貨。恒指現水平相當接近27200至27299點嘅牛證重貨區，大戶殺得興起，未知會否午後踩多一腳，殺埋呢千三張期指嘅牛證街貨先收工。

上周期指轉倉時，27450點係轉倉低位密集區，如今呢個位失守，基本上已有方向係向下，不過一旦今日午後期指重上27450呢一個位，提防大戶彈弓手。留意上周多次強調大市仍守27600點，反彈未完，相反失守就窩可，目前大市已失守27600呢個重要支持，上唔番去個市即使有短線超賣反彈，其後都係向下走。

金融股全線插水，跌得最勁當然係傳聞將被重罰超過10億美元嘅渣打(02888)，半日跌3.6%，裂口下跌兼失守多條移動平均線，睇嚟仲要向下尋底。至於其他金融股，無論國際抑或內地代表無一倖免，閒閒地跌1.5%或以上，四大內銀股更跌逾2%。

騰訊(00700)半日跌1.48%，上周反彈後失守330元，話咗短線要回落至315元，結果上半場最低見316.4元，半日報收318.4元，表現強差人意。至於港交所(00388)一樣無運行，半日跌至220元低位，中午報收220.6元，跟大市一樣險守20日線。

油價破頂，更有專家指年底油價將漲至每桶100美元，主要因為美國下月開始對伊朗實施新一輪制裁。中海油(00883)及中石油(00857)逆市升逾1%，成為表現最好嘅藍籌股。不過燃氣股就全線插水，又係政策所累，內地建議取消天然氣初裝費，有大行全線下調燃氣股目標價。新奧能源半日瀉15%；華潤燃氣跌9.6%；中國燃氣跌8.6%；港華燃氣跌6.8%；天倫燃氣跌近7%。

汽車股跟濠賭股跌勢亦顯著，前者沽壓未止再捱沽，後者因9月賭收顯著下跌，而大行亦唔睇好10月賭收，兩個板塊齊齊插水。油價高企加上人民幣疲弱，航空股被兩面夾擊全線下跌，當中以中國航空(00753)跌逾6%最傷。國泰(00293)已建議回復向乘客收取燃油附加費，加上油價回升其燃油對沖損失減少，但股價半日仍要跌3.2%。

之前阿Man提到聯想(00992)狗股亦有翻身之日，半日股價逆市上升，最高見5.93元，半日升2.4%。但其他科技股全面向下，其實美國嗰邊納指都有啲高處不勝寒嘅feel，加上上月港股由26200點水平反彈，科技股明顯彈力不足，睇嚟都係弱者繼續弱，唔使旨意有運行。

麥狄文
(徐狄怡‧證監會持牌人)