2018年9月20日
今朝坐巴士時悶悶地開個forum出嚟碌，睇睇吓見到有三個bro無啦啦Quit咗份工走去整咗隻app出嚟(係財經app嚟嘅)，咁當然新鋪開張就梗係有一串連嘅bug出現啦，喺fb同佢哋閒談一論之後，可能佢哋都掛住救亡中，anyway，真心加油，因為你哋係做緊一隻新app去企圖改變user 1X年嘅習慣。
依家10點正，同得人吹水就梗係坐定定喺公司度啦。上回講到噚日隻恒指牛(65682)買入價係$0.11，就算噚日下半場見到5分鐘圖上嘅SlowSTC(14,3)出現超買，但可惜隻牛就企喺度郁都唔郁，結果焗揸過夜(又唔係話唔想嘅，之不過你都知我份人耐性欠奉，人家說三分鐘熱度，我被我老爺話我得一分鐘熱度咋)，但今朝再次裂口開市，恒指開市報27605點，咦？咁咪即係噚日睇中嘅重貨區27600至27699點？跟住開睇條5分鐘恒指圖， 見到SlowSTC(14,3)又超買喎，所以就熄app去睇forum啦；去到依家10點10分，終於都見到恒指5分鐘圖出超買，而(65682)證價同今朝早開市水平差不多，用10點10分(65682)高低位($0.118/$0.115)拉個平均數$0.1165計，平均賺幅約6%，唔貪心嘅大原則之下，可以收網。
開恒指牛熊證街貨圖，其實噚日都見到有人話追貼價熊，應該就博個市上唔返20天線(27413點)嘅，誰不知今朝早一開市就殺晒熊證最貼價嘅27500至27599點，而呢度有943張期指；再上多100點，即係27600至27699點呢度，就有成1021張期指，依家10點22分，恒指最高暫時做過27628點，計埋依家恒指雖則三連升，兼且仲要升穿埋條「中期下降通道」；面對住咁重嘅熊證街貨，有乜可能會放過佢哋？反正乜都隊穿晒，繼續看好嘅就上望埋條50天線(27843點)添。
進取嘅，吼恒指牛(66205)，收回價27014點，同現價有逾500點差距，全場最貼兼最高槓桿；穩健嘅揀恒指牛(66126)，收回價26758點，同現價有逾800點差距。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan#
