2018年9月12日

【盤房來料】港股嚴重超賣反彈在即

美股隔晚造好，阿Man又表錯情以為港股今日會出力彈一彈，結果港股仍舊係鵪鶉咁嘅樣，恒生指數高開40點後跟隨A股下跌，最多跌202點，低見26219點；中午收報26317點，跌104點；國企指數半日收報10234點，跌98點。半日成交仍然唔夠500億元，繼續陰乾性下跌。港股彈唔起，主要係A股仍舊半死，人民幣離岸價又逼近6.9，咁搞法中港兩地股市又點彈得起。

重磅股方面，內銀股內險股偏弱，建行(00939)股價更跌至過一年低位，半日跌1.5%；工行(01398)跌1.6%；平保(02318)亦跌1.4%，再加埋排盤又弱過藥煲，暫時表現都係一路向西咁款。騰訊(00700)連續第三日回購，雖然銀碼唔係大，但總好過乜都唔做，毫無誠意，叫做穩住股價，但股價最高點都係312.4元，咁嘅反彈力，跟原地跳一吓又重返原地無分別。

至於藍籌表現最好係港鐵(00066)，雖然沙中線問題多多，但高鐵總算通車在即，點都要沖喜賀一賀，港鐵半日升2.8%，成為半日升幅最大藍籌。而資金流入避險類股份，中電(00002)亦錄得2.3%升幅，煤氣(00003)半日亦逆市升近1%。

濠賭股跌到唔識停，大摩驚個板塊唔死踩多腳，指喺宏觀因素影響下，今明兩年盈利預測要調低。其實中國經濟放緩風險大增，濠賭股盈利肯定有影響，濠賭股續跌，整個板塊至輕手都被質低2%或以上。

較早前內地教育部新政策影響教育股大插，早兩日又有防止兒童及青少年視力受損而限制打機，令到手遊股跌到一仆一碌，今日輪到中央指指點點醫藥及食品，表示為人民群眾生命安全着想，必須更加嚴格監管，醫藥股又應聲而下。醫藥股全線插水，至溫馨都跌超過3%，中生製藥(01177)雖為恒指新貴，半日亦插水10%。

其實大市累跌二千點，短線超賣隨時要反彈，偏偏內地股市成為港股最大負累，拖死港彈唔起，只係今日A股再跌，港股總算守住26200點，即係最重牛證街貨區搞掂之後，大戶暫時無心再踩多一腳，睇嚟港股反彈亦唔係無可能。只係港股步入熊市之後，每一次反彈力度減弱，每一次反彈時間亦縮短，港股面對熊市呢條漫漫長路，只有愈玩愈縮，即使入場博反彈亦只能眼明手快，走遲半步又係死路一條。

麥狄文
(徐狄怡‧證監會持牌人)