2018年9月11日
唔知大家仲有無望吓大台啲電視劇，噚晚我有呀，傳說中經典劇集嘅「再」版第一集嘛，故事一開始個背景就係2008年次按爆之前嘅時候，令我諗返起以前喺雜誌做投資版嘅日子；不過最正嘅係林文龍一句(大約啦)：最叻嘅唔係你有幾高超技巧或者好運贏好多，而係你識得去防去守。真係架，從來券商/fundman都係努力做好risk management嘅工作；從來我哋老散都係唔應該太博；從來【輪證贏家】寧願安全地賺餐茶都唔會刺激地搵桶金。
基於「安全地賺餐茶」，噚日確係無明確地推介牛定熊，事關恒指已經連續三個交易日個底插穿過保歷加通道底部，而日線圖上SlowSTC(14,3)嘅%K線同%D都已經開始踩入超賣範圍，估計恒指急跌完一輪都要回一回氣。當然啦，下半場恒指失心瘋咁跌500點，我明白呢一下係會責怪自己「死蠢」，點解唔順住個勢食多次熊仔/Put先收手呢？呢吓刀仔拮大脾嘅心情我明白，因為我噚日都係咁；但更重要嘅係真係見到恒指有跌定嘅跡象，所以先至唔敢博。今日恒指微跌2點開市；依家10點13分，恒指做緊26573點，跌40點，日線圖呈「十字星」，保歷加通道口拓闊比返恒指走返入條通裏面，SlowSTC(14,3)嘅%K同%D兩線仍然處於超賣水平，但係兩線嘅差距收窄，技術上，真係有準備喘定嘅情況。
不過，行都要交數，大鱷都要開飯，可能呢個比技術指標嚟得更實際。睇恒指牛熊證街貨圖，見到最貼價嘅係26400至26499點，呢度有相當於799張期指，同現價(10點18分mark底嘅26551點)，兩者相差151點；若然比多100點嘅話，即26300至26399點，呢度就有912張期指。至於上方最貼價嘅熊證就係27600至27699點，呢度有相當於541張期指，但同現價就有成千點嘅差距，講真，話就話個市有喘定嘅跡象啫，但如果個市喘定嘅目的係引更多嘅街貨流入貼價牛，再從而由一個咁近嘅位置乘保歷加通道口拓闊向下殺肥牛呢？故仔似係咁發展，如果市場繼續用中美貿易前景不穩定，影響跨國企業前景嘅藉口嚟推低個市嘅話。
恒指熊(62033)，收回價27738點，同現價有逾千點差距，安全且成交活躍；乘住向下行嘅大方向中小心技術性反彈嘅出現，且戰且走，速度上取緊要快。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan#
