2018年9月10日
依家10點5分，剛啱先返到公司，事關本身搭開嗰班巴士唔知做乜坐滿人，佢飛站；結果我要等多半個鐘先至有第二架巴士；返到嚟見到一堆crew喺我隔離set緊嘢，呀！上個星期講咗話有人上嚟拍MV，今朝返嚟先知原來係...(好鍾意帶cap帽嗰個呢...)。
Anyway，佢拍就由得佢拍，佢阻住我或者我阻住佢，我都已經預可能會返屋企home office，最緊要嘅都係睇返個市先。上個星期五恒指熊(61015)，講到明最好以Day Trade嘅策略去處理，睇返恒指5分鐘圖，上星期五下晝2點45分同3點25分呢兩個位見SlowSTC(14,3)出現「雙頂」，呢個時間就最好送(61015)落場，而呢兩個位證價做緊$0.114/$0.117水平，拉個平均數即係$0.1155作為買入價，好彩尾市時都見個市向下行返，去到最後4點鐘收市前5分鐘嚟講，證價高低位拉個平均數都只係得$0.14，點都輸$0.0245。若然無做day trade，認為個市之後都係向下行嘅機會係高嘅話，揸到今日，依家10點29分，恒指做緊26601點，跌373點，你想幾時走隻熊仔都得啦。
又睇返今日個市，明明本身開市時跌50零點，好地地又無啦啦依家倒跌300幾400，按恒指最低做過嘅26562點計，最貼價牛證26600至26699點呢度嗰1024張期指全數死亡，而26500至26599點呢度就有接近一半嘅街貨死亡；而更正嘅係26400至26499點呢度有837張期指，暫時計呢度已係牛證嘅第一重街貨。
向上望熊證，最貼價都係27800至27899點，同現價(10點49分嘅26677點)比，要個市拗腰向上彈1123點先至可以爬上到第一個check point，對依家個弱勢市嚟講確實有啲難度；而且呢個位只有172張期指，要向上數多兩層，即28000至28099點先至有1193張期指叫做「見得吓人」。
咁樣計就梗係話下行吸引力高啦，但要留心一樣嘢就係計埋今日恒指已經連續三個交易日個低插穿過保歷加通道底部，而日線圖上SlowSTC(14,3)嘅%K線(8.62)同%D(11.13)都已經開始踩入超賣範圍，同步14RSI都見33.49，「中期下降軌」雖然仍在，但「短期下降軌」會唔會有暫時要唞一唞嘅跡象呢？如是，無論你係好友定淡友，最緊要快手做trade，免得順勢趕唔切同個市一齊轉勢。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan#
