2018年8月27日
上個星期五(8月24日)見中國平安(02318)遇高回落，執定隻平安Put(18632)出嚟，已經諗住小注冷吼就算，不過下晝見平保由跌轉升，再將策略進一步收窄至day trade就算，不過好彩都有驚無險，喺下晝2點半時見平保5分鐘圖SlowSTC(14,3)由高位回落，比多少少耐性，終於到2點55分時見SlowSTC(14,3)由高位殺到落去嚴重超賣，仲要keep住呢個低位去到收市，按呢段時間嘅高低位($0.335/$0.31)拉個中位數$0.3325作為賣出價，對比上個星期五mark低嘅買入價$0.315計，都叫做賺返個手續費。
今日見恒指開市升300幾點，一大個裂口向上打，連條20天線(27889點)都收復埋，同步地即恒指現水平由此前嘅保歷加下降通道轉返上去保歷加上升通道，依家9點58分，恒指做緊27991點，升319點，最高暫時見過28053點。 開恒指牛熊證街貨圖睇，按恒指暫時做過嘅高位計，第一梯隊嘅熊證28000至28099點嗰475張期指，已經有部分死亡，再對上一級28100至28199點，呢度就有1532張期指；再上多級到28200至28299點，呢度都有1073張期指，反正都踩到入屋囉，唔爭在行多兩步入房。
睇埋下方牛證先，最貼價嘅係27500至27599點，呢度有300張期指，同現價比有400幾點差距，今個星期四(8月30日)就期結啦，換言之個市如果要追數嘅話就得番呢四日，恒指牛(59288)，收回價27358點，槓桿吸引、低街貨、成交活躍，喺一個捽數年代嘅社會裏面，就開隻恒指牛陪吓個市追數囉。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan#
