2018年2月20日

【輪證贏家】祝大家財「息」 兼收 ！

今日大年初五，小珊妹喺度祝各位豬籠入水！三財入庫！最緊要財「息」兼收！要乜有乜！相信大家係新年時都收到唔少朋友用一張JPEG同你拜年，Well，我都收到唔少，就等我用幾廿張JPEG同大家拜年啦。(我右邊班Sales同事已經開始組織「利是黨」，排隊逗利是啦！)

今日係狗年首個交易日，亦係香港金融大堂開幕，今朝港交所又點會唔熱鬧呀，不過其實如果今朝睇電視見到日經見紅嘅話，都估到恒指今日都未必開胃。恒指今朝開市先升49點，若如放假前所講，臨收爐前少少地入隻恒指Call嘅話，博坐過年博第一下開紅盤時就即刻閃人；雖則點數上又唔係話好多，但意頭嘅嘢唔係唔攞呀！

依家10點2分，自己TEAM同事嘅利是已經派晒，望望電視機見到條簽見到話恒指跌近400點；開埋個圖睇就見到恒指今日陰燭大支到不得了，低位做過30720點，都叫做穿過條50天線(30727點)；另外，由於時間關係，喺年三十(上週五，2月15日)死亡交叉出現咗(10天線(30480點)穿50天線)，即使日線圖上SlowSTC(14,3)嘅%K線(39.54)升穿%D線(29.78)，但係14RSI有掉頭跡象。

轉開保歷加通道睇，好明顯依家恒指處於保歷加下降通道，同時保歷加通道口有拓闊兼向下嘅跡象。

開埋恒指牛熊證街貨圖睇，依家10點24分，恒指做緊30904點，最低就仍然都係30720點。下方牛證最貼價嘅係30400至30499點，呢度有相當於362張期指，如果個市由依家向下行504點嘅話就會食得晒呢一曾嘅街貨。如果係上行嘅話，最貼價嘅就係31100至31199點，雖然呢度得56張期指，不過只要現價向上行295點就可以了；若然比多100點佢上，咁就可以上到去31200至31299點，呢度就有369張期指係度，睇到呢個數個心係咪定返少少先。

但坦白講，今日農曆年後首個交易日兼滙控(00005)同恒生(00011)公布業績嘅日子，雖則依家10點35分時恒指跌幅收窄，但見真係無乜街貨(好明顯係大家都收爐過年啦)，咁今日就不如觀察一日就算啦！又或者繼續係公司開開心心咁派/逗利是啦。

作者阿珊，從事財經及投資版報道超過10年，由平面媒體走到網絡世界，《鐘擺戰策贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]