2018年2月9日

【盤房來料】港股失守100日線宜作觀望

噚日阿Man認為個市未必咁快死得去，話口未完今日就死咗，即使阿Man到呢一刻仍未轉軚，但見到目前市況，亦不得不提高驚覺，當恒指開市未幾失守100日線(29609點)，先行將50日線水平買入嘅博反彈貨止蝕，不過仍保留倉底平貨。幸而阿Man喺三萬三水平，多次提醒大家要鎖定利潤減磅沽貨，否則面對近日市況將束手無策。目前已預留倉位，等待大市調整完成，才再考慮入場。

美國債息再度急升，市場擔心債市步入熊市，加上程式沽盤帶動，令美股一瀉如注，拖累全球股市股價急挫。而A股更加連失多個重要支持，阿爺歲晚收爐，跌幅持續擴大，完全未見國家隊出動維持秩序。恒指今早裂口低開772點，報29679同時係半日高位，甫開市即失100天線(約30609點)，其後跌幅擴大，最多跌1322點，見29129點，創去年12月21日以來新低，中午收報29436點，跌1014點或3.3%，國企指數中午收報11875點，跌504點，跌幅高達4.1%。

重磅藍籌股當然跌到一仆一碌，跌幅閒閒地2%或以上，騰訊(00700)一度失守400元，低見398元；港交所(00388)則跌至255.2低位，半日反彈至260元。但仍錄得4%跌幅。大笨象(00005)係幾隻重磅股中，表現最差，已抹去由12月初嘅所有升幅，幾乎打回原形。不過公司喺20日過年後公布業績，未知業績能否為股價帶嚟支持。內銀股及內險股為重災區，普遍下跌4%或以上。內房股亦繼續受壓，個別股價更一度跌逾一成。

港股暫時失守100日線，情況急轉直下，目前入場博反彈宜三思，阿Man一向宗旨為寧買貴，莫買錯，雖然未能確定大市由牛市步入熊市，但美股跟A股兩面夾擊，港股暫時唔死都一身潺。目前只宜觀望，待大市反彈並企穩100日線，跌勢終止再重入場，反正有錢喺手唔怕冇貨買。

麥狄文
(徐狄怡‧證監會持牌人)