2018年1月29日
今日櫈都未坐，行緊返公司咋，就已經收到戰友Jack嘅WhatsApp：「淨係得內銀係咁升…」。返到公司斟完杯水之後，戰友Jack補多槍：「內銀痴咗！」口痕友(即係我)問：「建行10蚊未？」「建行(00939)嘛，好明顯係依家個day high就係$9.39啦」能夠因為呢啲無聊話語而笑嘅，我諗都係得我哋兩個，仲要有緣到周末兩日都喺街到對方(當然包括埋我家老爺同佢家戰友太太啦)。
睇返個市，恒指今朝開市報33335點，升181點；依家10點9分，恒指最高做過33484點，即係話33300至33399點嗰堆熊證已經死亡。開恒指牛熊證街貨圖睇，呢個位置原來等於熊證第二貼價區，計埋最貼價嘅33200至33299點，呢度夾埋有1352張期指，絕對係一個營養豐富嘅早餐。
繼續睇熊證，依家最貼價嘅變相係33400至33499點，呢度有相當於255張期指，而再向上數多100點，即係33500至33599點，呢度有相當於653張期指。本身今日睇恒指牛熊證街貨圖時，呢653張期指只係屬於第二重貨區，但第一重貨區33300至33399點(有801張期指)都已經被大市晨早當早餐食咗。依家10點28分，見到恒指升幅比今朝早曾升逾300點係有所收窄，所以暫時恒指日線圖形態上呈「倒T星」，如果呢個樣持續至收市嘅話，咁淡友好可能會大嗌：「機會嚟啦，飛雲！」
係咪真係機會嚟？搵唔到飛雲問嘅話就再望望恒指牛熊證街貨圖啦，下方牛證最貼價嘅係32200至32299點，有相當於517張期指；重貨區就係第四貼價嘅31900至31999點，呢度有相當於1427張期指；至於第二重貨區就係32100至32199點，呢度有相當於940張期指，亦係第二貼價區。就用依家恒指做緊嘅33304點計數，單計最貼價嚟講都有成1104點差距，睇嚟呢粒「倒T星」都只能夠作「觀賞用」，並非往後日線圖上嘅「分析用」。
拆開恒指5分鐘圖睇，依家10點40分，恒指由今朝早高開生咗支大陽燭出嚟之後，就再築多條「下降通道」下行，至今下行中亦未見有止步跡象，事關5分鐘圖上嘅技術指標都未觸底超賣作反彈，若睇大市會續乘內銀股而破浪再上嘅話，恒指牛(60723)，收回價32121點，，成交唔算多但勝在街貨少同槓桿有約30倍，見恒指5分鐘圖超賣先送佢落場。
作者阿珊，從事財經及投資版報道超過10年，由平面媒體走到網絡世界。相信技術分析，由窩輪到牛熊證無一不炒，唔貪心，志在搵餐下午茶。
