2020年10月20日
噚日揀咗隻恒指牛(59592)出嚟，平均買入價為$0.045，都估到唔會呢頭買完，嗰頭條SlowSTC(14,3)就彈咗上去；但又真係無諗到下半場恒指悶到幾乎以為時間停頓咁滯，不過喺下晝3點10分至3點25分，SlowSTC(14,3)再次上到80以上超買水平，按呢段時間(59592)高低位做過$0.052/$0.051，平均價$0.0515，一計之下都有14.4%進賬。
今朝坐巴士返工勁塞，返到公司比平時都晏咗少少，所以一返到嚟就見到成班同事坐晒喺度，搞到我都有少少唔好意思。返到嚟開晒機大約9點50分到啦，聊天室室友們有部份已經入定恒指牛，事關就喺我塞緊車嘅時候，見到恒指開市後，5分鐘SlowSTC(14,3)開始下行，留定隻比較高槓桿嘅恒指牛同埋入市指示後，斟完杯茶坐定定之後，大家都紛紛食即日恒指牛，依家又反手啦，同場加映隻港交所(00388)熊仔，真開心！
上個星期見恒指日線圖出咗「黃昏之星」後，第二日即見一粒小陽燭補咗槍，將「黃昏之星」變成「身懷六甲」，轉身射個三分波後，令日線圖條SlowSTC(14,3)喺高位再次屈返向上，唯牛前處於保歷加上升通道中間，呢啲五五波、估嚟估去嘅嘢，從來都唔係好嘅入市時機。
恒指無嘢玩又試下向個股埋手，搵咗好耐，終於搵到隻冷冷地嘅個股，但個樣唔止衰衰地咁簡單，呢隻就係從來都未喺呢度出現過嘅石藥集團(01093)。
日線圖上見石藥計緊今日為止出現五連跌，SlowSTC(14,3)於此前80水平下行至目前超賣至嚴重超賣範圍，由噚日開始更跌出保歷加通道底部，不過至今保歷加通道仍然拓闊，換言之即係有可能仲有下跌可能，反正日線圖上SlowSTC(14,3)%K線都未向上升穿返條%D線，就放佢入去watch list度先啦。
題外話，有讀者反映話想【輪證贏家】唔止做即市trading咁簡單，Well，方法就當然係加入聊天室啦；不過都明白唔係個個打工仔可以日日開住個Chatroom一齊日日食到飽嘅，所以早兩日開咗個Patreon，暫定不定期會upload一啲同輪證相闗嘅教學/基礎文章(盡力一星期一隻)，大家上返Patreon再search「輪證贏家」就可以搵到。係有最低消費嘅，如果你認為文字有價，相信大家都願意付出(其實都係一個負擔得起嘅數字啫)
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/Patreon/秒投聊天室：輪證贏家
