3月12日 14:12

【輪證下半Part】係咪要見17000點先？

今朝開市首兩注同戰友用1分鐘圖嚟快來快去一趟，相當刺激，而睇專欄嘅你，我當然無辦法喺度呢同你用1分鐘圖去做Trade啦，所以如常的用返小時圖，只不過今朝指數嘅擺位同小時圖嘅線比較遠，所以換返之前比較常用嘅五分鐘圖做Trade，揀定恒指牛(51847)同恒指熊(65444)出嚟，睇下指數同五分鐘圖嘅10線點攞位啦。

以今朝出文時間為10點23分，如常的用10分鐘作為睇文時間的話，即於10點33分再睇返恒指五分鐘圖，當時指數已經重奪五分鐘圖嘅10線，踩穩線即可比注好倉出去，(51847)揀好嘅，同樣地用返10分鐘作為落場時間的話，按10點35分起計10分鐘，期內(51847)0.044元/0.039元，平均買入價為0.0415元。

落場後指數都未係見好有大變化，幾Round以為屋企Wifi有事，個市好似唔多郁咁，所以連同戰友都借五分鐘圖10線出咗呢注小時圖佛系注，反正大家都要工作吧！

午前再睇，估唔到指數愈上愈有，唔覺唔覺幾十點咁爬下日內新高，去到11點45分指數開始出現屢創日內新高，至午前見16880點嘅Day High：同步指數亦都保持企於五分鐘圖10線之上。

無Set目標價嘅，因為向來目標都係自己數住格仔做嘅；止蝕位比返入好倉時嗰一個位就可以架啦，呢個都係呢個專欄嘅一貫做法啦，喺呢個case嚟講，下方量度線就即係五分鐘圖嘅10線。

下半場開市之後我都怯怯地，恒指唔知食錯咩藥，想一下子推高至17000點樓上咁滯，講真，好耐無見過17xxx字頭啦，我都怕自己打錯字呀！

好倉/(51847)仍然在手嘅話，用返上面講過嘅量度線去做Trade啦；萬一去到今日3點50分時都未見到指數向下失五分鐘圖10線的話，咁你都仲有10分鐘時間去諗過唔過夜/處理咗佢先嘅。

作者阿珊，以技術分析專心玩輪證，唔貪心，努力賺取我家肥貓罐罐。

Patreon作戰室免費試用：https://www.patreon.com/join/cbbcwar