3月19日 14:36

【輪證下半Part】繼續等back test

今朝揀咗隻恒指牛(51677)出嚟，計劃喺小時圖上見企穩100線嘅話就出動；或者借五分鐘圖Slow STC(14.3)觸底向上當行一趟Swing Trade收工。以今朝出文時間為10點11分，如常的用10分鐘作為睇文時間的話，即於10點21分再睇返恒指走勢圖，當時見指數剛於10點20分同10點15分呢兩粒五分鐘圖高位出咗爭兩點「平頂」+低走於中軸，還好Slow STC(14.3)兩線仍然向住超買方向，不過未到超買範圍，咁嘅情況反而有少少轉勢Swing出現。

再等多十分鐘，指數仲未上過中軸，同時Slow STC(14.3)開始見%K線低走於%D線，呢啲樣真係出唔到好倉。而指數一直Keep住咬中軸，低角度斜向下同時保歷加通道口收窄，唉，搵個位摺條罅入去都有難度。

食咗粒敏感藥(因為我開始懷疑我瘋狂打乞次並唔係真係因為傷風，而係唔知做鼻敏感)有少少眼瞓之際，戰友傳來訊息「日本加息」，呵，喺Patreon講咗幾日嘅BoJ有可能宣布結束負利率政策單嘢今日成事，為自2007年以來首次加息，本以為日圓會因為加息而變強，不過啱啱睇好似兌緊5.22(每百日圓兌港元計)，maybe呢一Round久違了嘅加息只係加10點子，數值上真係不痛不癢，所以對日圓未見有太大影響；any肥，義意大於一切。

下半場開市後見指數於小時圖再次靠近返下方150線，至於五分鐘圖上見指數於低位徘徊中，整條保歷加向下之下，Swing仍然有條件出現，但都只限以五分鐘圖去做，仲要睇住指數係咪只係借保歷加底線同10線做Swing。

望望月曆，明日一連兩日到美國聯儲局議息，還不如靜靜地過埋呢兩日，雖然通街都話今次應該都唔會減息，但一日鮑爺未講嘢同議息結果未落實，一日都仲有變數嘅；下半場例悶無嘢玩先係主因，無咩事呢個半場因住同噚日一樣，去到最後一個鐘先至有異樣呀。

作者阿珊，以技術分析專心玩輪證，唔貪心，努力賺取我家肥貓罐罐。

Patreon作戰室免費試用：https://www.patreon.com/join/cbbcwar