1月22日 13:18
天文台未發出寒冷天氣預告，港交所(00388)率先發出，恒指今日高開低走後再再表現穿大關口齊點數位，15000點喺上半場時已經失守，半日港股成交有見500幾億，中午收報15004點，算你爬返上去但呢個位點都要打一陣攻防戰。
今朝揀咗隻恒指熊(66913)出嚟，揀嗰時同當時恒指現價只係得返大約330點，以博小時圖唔過10線而出動嘅。以出文時間10點11分起計，如常用10分鐘作為睇文時間的話，即於10點21分再睇返恒指走勢圖，當時指數仍然低於小時圖10線，(66913)keep住亮起入場訊號。再如常的以10分鐘作為買入(66913)的時間，期內(66913)高低位做過0.056元/0.05元，平均買入價為0.053元。
呢一注淡倉如常的無set下望目標係幾多，不過如果見到15000點呢口價已經穿咗，即係首兩層重貨牛確認全數死亡而走貨的話，亦係非常合理，因為我同戰友們都係咁做。極其量借返五分鐘圖10線作量度線，事關小時圖10線同現水平已經差很多，亦使借返之前畫嘅底線作量度線，呢條線擺位見15200點水平，都同現價有成200點嘅差距，唔太適合作為Day Trade嘅量度線。
指數嚟到依家呢個位，再次挑戰去年低位14597點，一旦再創新低，咁就真係要數返2008年金融海嘯後嘅第一個反彈浪低位，即2009年初嘅11344點。記得當年樓市其實同樣都係多掂，印象中亦有唔少業主急住沽貨套現補倉。今時今日環境唔同，未必急住要套樓補倉，但樓價受著其他因素影響而下行成為不爭事實。
股樓齊插，對本地地產股而言來說是百上加斤，同步亦發現大部份本地地產股的市賬率(PB)都跌到得0.3倍左右。參考此前本地地產作出私有化的合和實業(前00054)和聯合地產(前00056)，前者於2019年私有化時市賬率為0.64倍；後者於2020年私有化時，期市賬率則只有0.34倍。怪不得市場再傳本地地產股私有化之嫌。
睇返上年數據，上年總共有15間公司宣布進行私有化，當中比較「大事件」嘅為海通國際(00665)，集團在宣布作出私有化之後，股價翌日飆升近1倍，同時帶動香港中資券商股一同上行；同行憧憬嘛。
雖然私有化或可為股價殺出一條血路，但的確就只有一下，因為消息會同樣地都是一下子就被消化；更重要嘅係私有化嘅價錢係幾多，溢價勁嘅話先至有一石激起千層浪嘅效果。
呢啲都只係Mark住先架啫，如果連誠哥都將長實作私有化嘅話，咁到時要考慮嘅又唔止係佢溢唔溢價咁少事啦。
終於等到下半場開市，指數暫時仍然算是喺15000點邊皮打緊攻防戰，呢一刻好難講15000點打唔打得贏，或者集合大家嘅力度就會有答案：你身邊仲有無人講緊買邊隻撈貨呀？
(66913)仍Set五分鐘圖過10線為量度線。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
