1月17日 14:08
大市愈跌愈有，三層重貨牛全數死亡之後，恒指鯨吞逾5000張期指街貨，食量同藍鯨無乜分別。而今朝揀嘅恒指熊(66528)，係按住小時圖見保歷加通道口拓闊而出嘅，以今朝出文時間為10點23分，如常用10分鐘作為睇文時間的話，即喺10點33分再睇返個市，小時圖仍然見到保歷加通道口拓闊，指數仲有向下再走嘅空間，只係要預咗之後嘅跌勢未必如開市後首半小時咁刺激。
唔緊要，方向正確就可以啦。如常再以10分鐘作為買入(66528)計，即10點30分至10點40分入(66528)的話，期內(66528)高低位做過0.084元/0.08元，平均買入價為0.082元。
午前指數五分鐘圖上見一直被10線壓住，半場低位見過15411點，則連15400至15499點呢層都只係得返11點生命值。個市一下子咁樣被轟落去，坦白講我反而係覺得係一件好事，事關一下子炸過去，至少會令到有部份嘅人選擇打退堂鼓，當然市場上仍然有人會問：「可以撈底未？」
睇返之前大市以一浪低於一浪嘅形式慢慢由2023年初嘅22000點左右向下打到依家15400點，累跌6600點期間總共有幾多人、問過幾多次同一個問題？開下電視睇下啲Phone-in節目你就會知，而去到今日都仲有人再問嘅時侯，就知道呢段路期間有幾多人、有幾多錢去「撈底」入貨，而最終變成蟹貨。
反過來說，要指數望返上去，唔多呀，睇返17000點或18000點呀，要破幾多層蟹貨先至可以上得到去？當然，有錢又肯買嘅，打上去嘅難度係低咗嘅，但你睇下啲成交，你睇下依家啲錢嘅流向，分分鐘過兩日有人會問我：「印度股市可以點玩？」(唔呃你，呢個目題嘅文我都準備好會出)
又咁講，當美團(03690)返去到招股價、港交所(00388)同京東(09618)創新低嘅時侯，指數再搵重磅股沽落去，真係要問下：「仲有邊隻未炸？」按照慣例，下一浸應該會去到二三線股份，再落就細價股出禾雀亂飛格局。依家呢？
睇返隻(66528)先，喺下半場見小時圖嘅保歷加通道頂線都有開始向下嘅情況，一旦確認向下，則整條保歷加通道亦將會呈下，指數同Slow STC(14.3)則增加出現觸底嘅可能，如是者(66528)就需要走貨架啦。
近少少嘅，拿緊啲線嘅，用返五分鐘圖嘅保歷加通道中軸作為量度線都可以。而如果保歷加通道口有拓闊的話，咁就更加好啦。望望鐘依家1點8分，指數向下再落多級穿埋15400至15499點，即今日全日被收回嘅期指張數為5672張，再睇埋隻(66528)證價做緊0.088元，邊個位收割？你鐘意啦！
好彩，仲有熊證/Put可以喺跌市中搵餐茶飲下。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
