2月14日 13:49

【輪證下半Part】過年博紅盤注你擺咗彩未？

今朝無揀過任何貨，事關仲要處理埋過年前出嗰注博開紅盤嘅六合彩注好倉，老老竇竇今朝起身見隔晚美股咁嘅衰樣，都有擔心港股今日一開即撻死，還好都只係跌160幾點開市，向下將第一層牛證全數收回之後，一個鯉魚翻身，半日市時間已經將指數由跌轉返做升，恒指中午收市報15768點，倒升23點，當然不比今朝上半場一齊開出好倉嘅戰友們食得咁多，但總算呢注博開紅盤嘅成事先。(係呀！低開高走如果今日最後都係高收嘅話，都係叫開紅盤架！)

下半場開市後指數向上再上，依家1點13分，暫時高位見過15826點，上到呢個位即係代表恒指今日出上下其手，上方15700至15799點嘅第一層熊如是者被佢全數收回，不過呢度都只係得相當於24張期指，意義大於數量。

同步，喺五分鐘圖上見到指數亦於呢個高位出「平頂」，疊加一條150線喺頭上邊向下壓過嚟；小時圖都有150線架，暫時見上影線掂到過，係未企穩兼有啲似出「射擊之星」嘅物體，不過依家都只係1點18分，仲未成形嘅。

至於手上嘅過年博開紅盤注，喺指數倒升之後都相信呢注過年好倉已經由負變正，收割咗佢幫自己喺龍年首個交易日先取正數，擺個頭彩完全無問題；但如果你仲想Hold住的話，呢注最多都係hold埋今日，hold得緊嘅借五分鐘圖10線作下方量度線，過得埋150線就Keep住借線去；而如果計劃借小時圖再hold耐少少嘅，同樣以上方過150線為目標，下方10/50線作量度線要守穩。

作者阿珊，以技術分析專心玩輪證，唔貪心，努力賺取我家肥貓罐罐。

Patreon作戰室免費試用：https://www.patreon.com/join/cbbcwar