2月6日 13:44

【輪證下半Part】恒指牛放養都拉實線

今朝揀咗隻恒指牛(68897)出嚟，計劃先留意指數回落15700點有無支持，見支持出好倉可以，否則如常用返五分鐘嘅Slow STC(14.3)做Swing Trade，即係等回到落超賣位先至出手。

以今朝出文時間為10點15分，如常用10分鐘睇文的話，即10點25分時再睇返走勢圖，見指數繼續擺位高於15700點同時，仲keep住處於小時圖100線之上，比多五分鐘時間見指數喺五分鐘圖借埋條10線唔穿，(68897)可以落場。

以喺10點30分見指數借到五分鐘圖10線而出(68897)的話，如常用返10分鐘作為買貨時間，即於10點30分至10點40分買入，期內高低位做過0.061元/0.055元，平均買入價為0.058元。

今日反而少見好似噚日咁「大陽燭」忽然出現隊爆個市而博人追棍，沿住10線慢慢向上運行之下，小時圖喺11點至12點仲企埋上50線，再嚟到依家1點17分，除咗開市嗰支「大陽燭」外，下半場一開先見今日第二支「大陽燭」，仲要呢一棍一隊隊到上16000點樓上，暫時高位見過16041點。而呢一口16000點亦都將熊證首三層街貨全數收回，呢度夾埋有相當於1121張期指，唔知佢夠過年未呢？

(68897)基本上出貨到依家，要買個盤菜同買多底蘿白糕都應該無乜問題，可唔可以喺個蘿白糕上面加隻鮑魚，就要睇小時圖保歷加通道口可唔可以保持拓闊，借得到150線比力再推指數向上高一把。

嚟到呢個Moment，隻(68897)咩位食隨得你，但應承我，Set好五分鐘圖10線作為下方量度線，一過即走，大不了比返隻鮑魚佢啫！

作者阿珊，以技術分析專心玩輪證，唔貪心，努力賺取我家肥貓罐罐。

Patreon作戰室免費試用：https://www.patreon.com/join/cbbcwar